Nanloob sa bahay ni Angelika Dela Cruz huli
ARESTADO ang 19-anyos na kawatan nang pasukin at pagnakawan ang bahay ng aktres at kasalukuyang barangay chairwoman na si Angelika Dela Cruz Biyernes ng madaling araw sa Malabon City.
Sa ulat na tinanggap ni Malabon police chief P/Col. Albert Barot, dakong 3 a.m. nang pasukin ni Steven Ramos, residente ng C4 Road, Brgy. Bagong Bayan North, Navotas City ang bahay ng akres sa No. 61 Gen. Borromeo St. Brgy. Longos sa pamamagitan ng pag-akyat sa bakod at pagdaan sa sliding window ng bintana sa gilid ng bahay.
Habang sinasamsam ng kawatan ang iba’t-ibang uri ng alahas, gadget at dolyar na pag-aari ng kapatid ng aktres na si Mariko Nicolette Egger Dela Cruz, 23, isa ring artista na may screen name na Mika Dela Cruz, nagising ang dalaga kaya’t humingi ng tulong sa mga kaanak na kaagad nakatawag ng barangay tanod at pulis.
Nang dumating sina Pat Alexis Flores at Pat. Noel Tindugan ng Malabon Police Sub-Station 5, kasama ang mga barangay tanod ng Barangay Longos, hinanap nila sa loob ng bahay ang suspek hanggang sa mahuling nagtatago sa ilalim ng kama na nasa loob ng stock room ng bahay ng biktima.
Nakuha kay Ramos ang mga kinulimbat na alahas, gadget at dolyares na may kabuuang halagang P182,000 at patalim.
Kasalukuyang nasa kustodiya na ng Malabon Police Station Investigation and Detective Management Branch (SIDMB) ang suspek na nakatakdang ipagharap ng kasong panloloob sa piskalya ng Malabon City.
