ISANG bukas, maayos, at payapang diskurso’t pagtingin tungkol sa diborsyo.

Iginiit ito ni Sen. Robinhood “Robin” C. Padilla noong nakalipas na Martes sa pagtalakay ng mga panukalang batas tungkol sa Divorce Bill na nakasalang sa Senado.

Si Padilla, naghain ng Senate Bill 237 o ang Divorce Act of the Philippines, ay naysaying bagaman nauunawaan niyang masalimuot at may implikasyon ang paksa sa lahat ng indibidwal at pamilya, hindi tumutugon ang kasalukuyang batas para sa mga pamilyang nawasak na.

Naibanggit din ni Padilla ang kanyang karanasan matapos makipag-diborsyo sa kanyang asawa kung saan sila at ang kanilang mga anak ay parehong maligaya na ngayon dahil maayos ang nangyaring paghiwalay.

“Sa kasamaang palad, ang ating mga umiiral na batas ay hindi tumutugon sa masalimuot at delikadong dinamika ng iba’t ibang uri ng pamilya, lalo na ng ilan kung saan ang kasal ay tuluyan nang nawasak at hindi na kailanman mabubuo pa. Sa mga ganitong pagkakataon, ang diborsyo ay hindi banta sa kabanalan ng kasal; ang diborsyo po ay pagtanggap sa realidad na walang anumang uri ng lunas ang kayang humilom sa ilang pagsasamang tuluyan nang nawasak at nasira,” anang senador.

“Sa kabuuan, aking lubos na nauunawaan na ang paksang ito ay masalimuot at may direktang implikasyon sa lahat na indibidwal at pamilya.

Sa gayon, hiling ko po na bawa’t isa ay bukas sa maayos at payapang diskurso. Dapat nating limiin ang isyung ito na may simpatiya, paggalang at dahan-dahang makinig sa lahat ng boses kabilang ang may salungat na pananaw. Inshaallah, tayong lahat ay matuto na sa makabuluhang dayalogo na hahantong sa isang resolution na sumasalamin sa ating mga pagpapahalaga bilang isang bansa,” dagdag ng mambabatas.

Iginiit din ni Padilla na bagama’t hindi kailanman madali ang desisyon na tuldukan ang kasal, legal na proteksyon ng diborsyo ang tanging magsasalba sa esensya ng pamilya kung said na ang pagmamahal, respeto at suporta sa pagitan ng mag-asawa.

Kailanman ay hindi pagyurak sa kasal ang diborsyo. Sa halip, ito aniya ay nagbibigay ng proteksyon sa mga nakulong sa pagsasamang wala nang pag-asang buhayin pa.

“Hindi ito pagyurak sa kasal. Kailanman di po kami maging instrumento na sirain ang isang kasal. Never… Pero bilang mga mambabatas katulad ninyo, pinaghahawakan din namin ang Konstitusyon at lahat gagawin namin para pagtibayin ang kasal. Pero kung dumating ang panahon na hinihingi na ng isa, dalawa o tatlong Pilipino na magkaroon siya ng kalayaan sa kasal, yan karapatan na niya,” aniya.

Muling nanindigan si Padilla na ang kahalagahan ng pamilya sa ating lipunan ay hindi matatawaran, at malinaw sa ating Saligang Batas ang garantiya na pagbibigay proteksyon sa pamilya bilang isang pangunahing institusyong panlipunan.

Gayunpaman, aniya, kailangang kilalanin natin na ang mga pamilya ay may iba’t ibang anyo, mukha at hubog – “at lahat ng uri ng pamilya ay nararapat na bigyan ng proteksyon at suporta, kabilang na dito ang single parent household, mga pamilyang may anak mula sa adoption, at mga blended families na di saklaw ng tradisyonal na istraktura ng pamilya sa ating lipunan.”

“Sa gayon, ang legal na proseso sa pagsasawalang bisa ng kasal ang natatanging paraan para mabigyan ng proteksyon ang kapakanan at interest ng myembro ng isang pamilya,” wika pa ng mambabatas.

Ayon kay Padilla, kailangang bigyan ng proteksyon ang mag-asawang nakulong sa mapang-abuso at hindi ligtas na pagsasama. Dagdag niya:

“Hindi ba katanggap-tanggap ang diborsyo para sa isa sa apat na kababaihan na nakakaranas ng pisikal, sekswal at emosyonal na pang-aabuso ng kanilang katuwang base sa isang survey noong 2017 – ito ay maaaring dahilan kung bakit dumarami ang bilang ng mga Pilipino na bukas sa legalisasyon ng diborsyo.

Base sa isang survey noong 2017, 53% ng Pilipino sa hustong gulang ang positibo ang pagtugon sa pangangailangan ng diborsyo para sa mag-asawang di magkasundo, dagdag niya.

Sa ganang akin, magandang paksa ito sa pagsalang ng naturang panukalang batas.

Ramdam natin ang bawat pahayag ni Senador Padilla na hindi man natin alam ang kanyang pinaghuhugutan, ngunit natitiyak tayong nasasabi niya ito ng sinsero dahil ito mismo ay dinanas niya sa tunay na buhay.

Maaaring marami pa rin ang tumututol na makaroon ng diborsiyo sa bansa.

Ngunit ang mga testamentong ganito na mula mismo kay Padilla na naranasan niya ng personal ay maaaring namnamin ng husto ng ating mga mambabatas at mga ‘stakeholders’ na ipatatawag ng Kongreso para mahimay ng husto ang naturang panukalang.

Nasisiguro kong marami pang katulad ni Padilla ang umaayon sa kanya – maging ito man ay mula sa partido ng lalaki o babae.

Umaayon ako kay Senador Padilla na hindi na maaaring mabuo ang wasak nang pamilya.

At mas umaayon ako na sakaling magkaroon ng diborsiyo ay maaaring makapagsimula nang panibagong buhay ang mag-asawang pinaghiwalay ng landas dahil sa hindi na magandana pagsasama.

Ito rin ang magiging daan upang maging ‘emotionally matured’ ang lahat, basta ang importante ay may garantiyang hindi nila papabaan sa isa’t isa ang kani-kanilang anak!

Pabor tayo sa diborsiyo at sana’y mapagtibay agad ito!