Ate Vi, emosyonal na inalay ang Best Actress trophy kina Sharon, Marian, Uge at Pokwang
Naging emosyonal ang Star for All Seasons na si Vilma Santos sa kanyang acceptance speech nang tanggapin ang Best Actress award for When I Met You in Tokyo sa katatapos na Gabi ng Parangal ng 49th Metro Manila Film Festival.
Ayon kay Ate Vi, hindi niya inaasahan ang pagkakapanalo.
“Hindi ko po ine-expect ito. Ang adbokasiya lang namin po talaga when we did When I Met You In Tokyo is not even the Best Actress or the Best Actor, we just wanted to do a simple love story, sa edad po namin,” umiiyak na sabi ng premyadong aktres.
“Pero ang talagang adbokasiya po namin ay maging successful ang Metro Manila Film Festival. And at the same time, mabalik po sana ‘yung mga tao sa sine,” patuloy niya.
“‘Yun po ang dream namin,” she added.
“And with these 10 movies that are showing right now under Metro Manila Film Festival, bumabalik po ang mga tao sa sine,” emosyonal pa ring wika ni Vilma.
Wish niya na magtuluy-tuloy ito dahil kailangang-kailangan ito ng movie industry.
Of course, hiling din niya na kumita ang pelikula nila.
“Ang inasam-asam ko rin po sana kumita ‘yung movie namin para naman po sa mga bagong producer na tumaya po sa aming dalawa ni Christopher de Leon. Nang sa ganoon, mas mag-produce pa kayo nang marami hong mabigyan ng trabaho,” she said.
Hanggang sa huli ay walang tigil ang pag-iyak ni Ate Vi habang nagpapasalamat sa mga producer, sa direktor, sa mga co-star niya at sa leading man at associate director na si Christopher de Leon.
Nakakatuwa rin ang gesture ni Vi na nag-shout out siya sa mga nakalabang sina Sharon Cuneta, Marian Rivera, Eugene Domingo at Pokwang at inalay ang kanyang award sa mga ito.
“Sharon, my friend, this is for you! I love you! And to my inaanak, Marian and Dingdong (Dantes), they’re my inaanak. I love you. I share this award with you. To my friends, Uge (Eugene), Pokie (Pokwang), this award is for us,” masayang wika ng Star for All Seasons.
Narito ang kumpletong listahan ng mga nanalo sa MMFF Gabi ng Parangal 2023:
Best Float – When I Met You in Tokyo
Best Child Performer – Euwenn Mikaell (Firefly)
Best Sound – Gomburza
Best Original Themesong – ‘Fingga Lickin’ (Becky and Badette)
Best Musical Score – Mallari
Best Visual Effects – Mallari
Best Production Design – Gomburza
Best Editing – Kampon
Best Cinematography – Gomburza
Gender Sensitivity Award – Becky and Badette
Gatpuno Antonio J. Villegas Cultural Award – Gomburza
Fernando Poe Jr. Memorial Award for Excellence – When I Met You in Tokyo
Best Screenplay – Firefly
Best Director – Pepe Diokno (Gomburza)
Best Supporting Actress – Miles Ocampo (Family of Two)
Best Supporting Actor – JC Santos (Mallari)
Best Actor – Cedrick Juan (Gomburza)
Best Actress – Vilma Santos (When I Met You in Tokyo)
4th Best Picture – When I Met You in Tokyo
3rd Best Picture – Mallari
2nd Best Picture – Gomburza
Best Picture – Firefly