49 nailigtas mula sa sunog sa QC, bumbero sugatan
UMABOT sa 49 katao ang nailigtas ng mga bumbero mula sa nagliliyab na gusali habang nasugatan naman ang isang bumbero nang sumiklab ang sunog sa Brgy. Laging Handa, Quezon City, Miyerkules ng umaga.
Sa inisyal na report ng Quezon City Fire Department, nadale ang kamay ni FO2 Joselito Cabote dahil sa pagbutas sa bahagi ng walong palapag ng ALPHABASE building na nasa kanto ng Scout Rallos at Tuazon sa Brgy. Laging Handa, Quezon City.
Ayon kay QC Fire Marshall Sr. Supt. Gary Alto, nagsimula ang sunog bandang 9:55 a.m. (October 26), sa tanggapan ng Momentum Construction Corporation na nasa ikalawang palapag, dahil umano sa nagliyab na exhaust fan ng kumpanya.
Dahil sa mabilis na pagkalat ng usok ay agad na ni-rescue ng mga bumbero ang 49 na tenant na nasa loob nang nasusunog na gusali, kung saan ang 29 ay mula sa 8th floor habang 20 naman sa iba’t ibang palapag.
Gumamit ang mga bumbero ng kanilang LUF 60 o ang unmanned firefighting machines at naapula ang apoy bandang 12:04 ng tanghali.
Sa inisyal na pagtaya ng QC Fire Department, aabot sa P4 milyon ang halaga ng mga ari-arian ang natupok sa sunog.
