3 leader ng NPA arestado, war materials nakumpiska sa NegOcc
TATLONG umano’y matataas na leader ng New People’s Army (NPA) ang naaresto sa isinagawang operasyon ng pinagsanib na pwersa ng pulis at militar sa Negros Occidental na nagresulta rin sa pagkakakumpiska ng gamit pandigma ng mga rebelde.
Kinilala ni Lt. Col. Magno M. Mapalad, officer in charge ng 3rd Infantry Division(ID)-Public Affairs Office (PAO), ang mga naaresto na sina Felix Susas Jr. alias Rigor, Kenneth, Glemore at Dapin, commanding officer ng SYP Platoon at secretary ng Northern Negros Front (NNF); Cheryl Catalogo alias Celo, miyembro nf Educational Staff ng NNF, at Jalen Susas alias Cristel/Izumi/CG, medical staff, Acting Finance, at miyembro ng Educational Staff, NNF.
Ayon kay Mapalad, ang mga umano’y leader ng NPA ay naaresto sa isinagawang joint operation ng 79th Infantry Battalion ng Philippine Army at Philippine National Police (PNP) na kinabibilangan ng 6SAB, PNP-SAF, RMFB6, 1st NOCPMFC at Municipal Police Stations ng Calatrava at Toboso sa Negros nitong January 6 sa Sitio Pinamactinan, Brgy Cambayobo, Calatrava, Negros Occidental.
Ang operasyon ay ikinasa bilang tugon sa reklamo ng mga residente hinggil sa presensia ng rebeldeng grupo sa kanilang lugar na nagsasagawa umano ng extortion activities.
Nakuha mula sa mga naarestong leader ng NPA ang dalawang caliber 45 pistols, isang caliber 9mm pistol, apat na rifle grenades, dalawang magazines lara sa caliber 45 pistol, isng magazine para sa caliber 9mm pistol, holster, 18 bala ng 9mm, pitong bala para sa caliber 45, 11 wallets na naglalaman ng P4,106.00 , tatlong back packs at personal na kabamitan.
Sa record ng pulisya, si Felix Susas Jr., ay may nakabinbing arrest warrant para sa kasong paglabag sa Republic Act 10491 sa Guihulngan City at nahaharap sa kasong Homicide sa Silay City.
Nahaharap din si Susas sa dalawang kaso ng murder dahil sa pagkasawi ni Renato Estrebillo noong August 12, 2022 sa Barangay Marcelo, Calatrava at Benjamin Javoc, kapitan ng Bgy.Lalong na napatay noong August 26.
Pinapurihan naman ni 3ID Commander Mgen. Benedict M. Arevalo ang tropa dahil sa matagumpay na resulta ng kanilang operasyon.
“We are thankful to the concerned residents and for trusting our troops because, through their reports, we were able to prevent the atrocities and potential harm the CPP-NPA Terrorist might inflict against the people,” pahayag pa ng opisyal.
Nanawagan din ang opisyal sa natitira pang miyembro ng rebelde na sumuko at magbalik loob sa gobyerno.
“We will continue conducting our operations to attain lasting peace and sustainable development in Negros Island. Hence, we urge the remaining CPP-NPA to surrender and avail the Enhanced Comprehensive Local Integration Program (E-CLIP) for a peaceful life,” pahayag ni Arevalo.
