INIREKLAMO ng ilang residente at motorista, lalu na ng mga delivery rider, ang ginawang pagpapasara sa pampublikong tulay na nagsisilbing short cut o mabilis na daan sa isang lugar sa Binondo, Manila.

Itinuturo ng mga nagrereklamo ang konstruksiyon ng 42-palapag na ginagawang residential tower sa lugar ang dahilan kaya’t isinara sa motorista ang maliit na Piedad Bridge sa Piedad St. na humahangga sa Masangkay St., Binondo area.

Reklamo ng ilang mga delivery rider, naaantala ang kanilang biyahe lalu na kung ang kanilang ginagamit na community driven navigation app ay itinuturong dumaan sa nasabing ipinasarang tulay sa Piedad St.

Malaki aniya ang nawawalang kita sa kanila dahil may ilang nag-aabono pa sa oras na maantala ang kanilang delivery, lalu na sa mga establisimientong nagtatakda ng oras ng kanilang pagdating sa lugar na pagdadalhan ng inorder na pagkaain, dahil sa paghahanap ng alternatibong daan.

May ilang gusali rin sa naturang lugar na katabi ng konstruksiyon ang labis na ring naapektuhan, hindi lang sa ilang mga debris na bumabagsak sa kanilang bubungan, kundi nagkakaroon na rin ng bitak ang kanilang pader.

Sabi pa ng ilang mga motoristang hindi na makagamit ng Piedad St. na sana raw ay masilip ito ng Department of Public Works ang Highways (DPWH) o ng Engineering Office at Building Official ng Pamahalaang Lungsod ng Maynila upang makita nila kung anong perhuwisyo sa mga riders ang resulta ng ginawang pagsasara sa pampublikong tulay.

Duda kasi sila na posibleng nalabag ang umiiral na PD 17 o Philippine Highway Act na nilagdaan noon pa ni dating Pangulong Ferdinand Marcos, Sr na nagbabawal na i-convert ang pampublikong highway, tulay, at iba pa sa sariling kapakanan o makasagabal sa anumang paraan.

Nang hingan ng tugon hinggil dito ang Manila Engineering Office, sinabi ni Engr. Arman Andres na kaagad niya itong ipai-inspeksiyon sa kanyang mga tauhan at tiniyak na gagawa sila ng kaukulang aksiyon sa reklamo sa oras na may nakitang paglabag.

AUTHOR PROFILE

Edd Reyes