PEŇARANDA, Nueva Ecija–Nagresulta sa pagkakaaresto ng gunman sa bigong pagpaslang sa bayang ito noong Linggo ang pagpapatupad ng “Oplan Bakod” ng Nueva Ecija police.

Sinabi ni police head Mayor Roderick N. Corpuz na natunton ng kanyang mga tauhan ang umano’y gunman at naaresto kasunod ng insidente ng pamamaril na nangyari sa Bgy. Las Piňas dakong 3:30 ng hapon.

Kinilala ni Corpuz ang naarestong suspek na si Edmon Javier, 47, magsasaka, ng Bgy. Mallorca, San Leonardo, Nueva Ecija.

Kinilala naman ang sugatang biktima na si Richard Leabres, 32, magsasaka, ng Bgy. Sto. Tomas, Penaranda.

Binaril ng apat na beses si Leabres at isa ang tumama sa kanyang likod na tumagos sa kanyang tiyan.

Lumabas sa imbestigasyon na naghahanda ang biktima sa pagtatanim ng kanyang sakahan nang biglang sumulpot ang suspek at tinawag siya.

Nang makitang may baril ang suspek sa kanyang bag, sinubukang tumakas ng biktima ngunit siya ay binaril ng apat na beses at tinamaan ng isang beses sa likod.

Isinugod ang biktima sa Nueva Ecija Medical Center dito ngunit kalaunan ay inilipat sa Dr. PJGRMMC sa Cabanatuan City.

Kasunod ng pamamaril, sinabi ni Corpuz na agad na inilunsad ang “Oplan Bakod” para tutukan at bantayan ang lahat ng posibleng rutang pagtakasan ng suspek na nagresulta sa agarang pagkakaaresto nito.

Kakasuhan ang suspek ng frustrated homicide.

AUTHOR PROFILE

Steve A. Gosuico