BBM-Sara UniTeam: Sports para sa Mindanao youth
PAIIGTINGIN ng BBM-Sara UniTeam nina Presidential aspirant Ferdinand ‘Bongbong’ Marcos, Jr. at vice-presidential bet Inday Sara Duterte ang mga programang pampalakasan sa Mindanao upang mailayo ang mga kabataan sa karahasan at makapagsanay ng mga bagong atleta na magbibigay karangalan sa bansa.
Ito ang sinabi ng dalawa matapos iulat ng Save The Children Philippines na noong 2019, mahigit 1.8 milyong kabataan mula sa Mindanao ang lubhang naapektuhan ng mga kaguluhan at labanan sa nasabing rehiyon.
Ayon pa sa ulat, maraming mga kabataan ang nasugatan, nagkasakit, at dumaan sa psychological trauma at ang iba naman ay nasawi, habang marami rin sa kanila ang natututo nang humawak ng baril sa murang gulang pa lamang.
Dahil dito, kumbinsido ang tambalan nina Bongbong at Sara na ang isang pinakamabuting paraan para mailayo sa karahasan ang mga kabataan sa rehiyon ay ang bigyang pagkakataon sila na sanayin sa iba’t-ibang larong pampalalakasan tulad ng swimming, weightlifting, marathon, boksing at iba pa.
Anila, kung magagabayan sa tamang landas ang mga kabataan sa Mindanao ay tiyak na magiging daan na rin ito upang makamit ang kapayapaan sa rehiyon.
“Naniniwala kami na ang isang pinakamabuting paraan para makamit natin ang katahimikan sa Mindanao ay kung mabibigyan natin ng pagkakataon ang mga kabataan na lumahok sa sports at iba pang katulad na aktibidad na magbibigay ng inspirasyon at direksyon sa kanilang buhay,” sabi ng tambalan.
Idinagdag pa nila na naniniwala sila na mayaman ang Mindanao sa mga atletang may natatanging talento na maaaring sumunod sa mga yapak nina Hidilyn Diaz, Nesthy Petecio, Carlo Paalam at Eumir Marcial na pawang nanalo ng mga medalya at nagbigay-karangalan sa bansa nonng nakaraang Tokyo Olympics.
Sina Diaz at mga kasama niya ay pawang tubong Mindanao.
Ayon sa BBM-Sara UniTeam, kasabay ng pagsasaayos ng peace and order na ginagawa ng pamahalaan, dapat isinasabay ang programa para sa mga apektadong kabataan upang maituon ang kanilang atensyon sa kapaki-pakinabang na gawain.
“Kasabay ng peace and order dapat may programa tayo para sa mga kabataang lubhang naapektuhan ng patuloy na bakbakan sa Mindanao, nakakabahala na sa murang edad ay marami sa kanila ang marunong nang humawak ng baril, kawawa ang mga batang ito, kaya nais namin palakasin ang sports sa kanilang lugar,” sabi ng BBM-Sara UniTeam.
Plano din nila na bumuo ng isang super body na walang gagawin kundi tutukan ang grassroots sports development sa rehiyon at magpapatayo rin ng lahat na mga kailangang pasilidad para magamit sa pagsasanay ng mga atleta.
“Dagdagan natin yung mga sports facilities sa Mindanao, tulad ng basketball, soccer field at iba pang mga pasilidad at magbubuo tayo ng isang tanggapan na tututok para magsanay ng mga kabataang atleta doon,” pagbibigay diin pa nila.
