ANIM na miyembro ng Bangsamoro Islamic Freedom Fighters (BIFF) ang nagdesisyng magbagong buhay at magbalik-loob sa gobyerno nitong Linggo sa Maguindanao del Sur.

Ayon kay Maj. Abdurahman S. Jainuddin, public information officer ng AFP-Western Mindanao Command (Westmincom), isinuko din ng mga dating miyembro ng extremist group ang kanilang mga armas at gamit pangdigma.

Gayunman, pansamantala munang hindi pinangalanan ang mga nagsisuko na pawang mga miyembro ng BIFF-Karialan Faction para sa kanilang seguridad.

Napag-alaman na ang anim ay sumuko nitong Linggo kay Lt. Col. Jayson Domingo, commanding officer ng 1st Mechanized Battalion (MB).

Sila ay iniharap kina Brig. Gen. Pedro Balisi, Jr., commander ng 1st Mechanized Brigade; Maguindanao del Sur 2nd District Representative Mohamad “Tong” Paglas; Maguindanao Del Sur Provincial Administrator, Atty. Cyrus Torreña; at Agila Haven Focal Person, Roger Dionisio sa 1st Mech Bn headquarters sa Barangay Kabengi, Datu Saudi Ampatuan, Maguindanao Del Sur.

Kasamang isinuko ng anim ang isang 60mm mortar, isang M16A1 rifle, isang garand rifle, isang cal. 30 carbine rifle, isang mahabang magazine, isang rocket-propelled grenade (RPG) na may isang bala, at isang improvised explosive device (IED).

Pinuri naman ni Brig. Gen. Arturo Rojas, acting commander ng Western Mindanao Command ang tropa ng 1st MB dahil sa matagumpay nilang operasyon.

“We, the armed forces, share all our gains and successes with our partners and stakeholders, the local government units, and the populace. Let us continue to strengthen our collaborative efforts to end terrorism and sustain stability here in Mindanao,” pahayag ni Rojas.

AUTHOR PROFILE

Zaida I. Delos Reyes