Josef, kinontra si Marco
KINONTRA ni Josef Elizalde ang biro ng katropang si Marco Gumabao na siya (Josef) na ang bagong prinsipe ng Viva.
Sa digicon ng pelikula ni Josef na kasalukuyang napapanood sa Vivamax, ang Purificacion, sinabi ng aktor na, “Ewan ko, mapagbiro lang naman si Marco, eh. Alam naman natin lahat na si Marco pa rin. Walang makakatalo naman kay Marco. Siguro kahit ako na lang ’yung sumunod, ok lang.”
Nag-ugat ang isyu sa biro ni Marco nu’ng storycon ng Baby Boy, Baby Girl nila ni Kylie Versoza na si Josef na ang Viva prince dahil sa sunud-sunod nitong proyekto tulad ng Kaka, Bekis on the Run, More Than Blue, X-Deal 2, Doblado at ngayon nga itong Purificacion.
Karamihan sa mga ito ay pulos sexy kaya natanong din si Josef kung hanggang kailan siya sasabak sa ganitong genre.
Aniya, “Siguro it really depends on kay Viva. For now, tuluy-tuloy muna ’to, nag-i-enjoy pa naman ako. Siguro sasabayan lang natin si Vivamax tapos eventually, we’ll see, we’ll see kung saan ako mapupunta.”
Samantala, anim na sultry Viva stars ang kasama ni Josef sa Purificacion at ito ay sina Cara Gonzales, Rob Guinto, Quinn Carillo, Stephanie Raz, Katrina Dovey at Ava Mendez.
