SINABI ni George Bernard Shaw na “ang mga taong nagsasabi na hindi magagawa ang bagay na ito ay hindi dapat manlibak ng mga taong kinakayang gawin iyon.”(sariling salin mula sa orihinal na Ingles). Nag-aaksaya ng oras at pagod ang ilang Senador at Kongresista sa pagkalap ng datos na kumikiling sa kaisipang inaanay ng maling paniniwala na suspindihin ang pagpapatupad ng Mother Tongue Based Multi Lingual Education sapagkat hindi raw ito kayang gawin ng DepEd, tutal naman daw ay walang mapapalang mainam na resulta ng pagkatuto sa mga bata. Hindi nila tinatanggap ang mga paliwanag at kilos ng mga guro sa iba’t ibang dibisyon ng DepEd at pagsusuri ng mga datos nito na ginawa ng iba pang may taya sa edukasyon. Sa kabila ng payak na pagpopondo ng MTBMLE, malinaw na hindi nagpapabaya ang mga guro na dalisay ang kabayanihan.

Para sa may sentido komon, ang MTBMLE ay akma sa isang multi-linguwal na bansa na bahagi ng isang multi-linguwal na mundo. Upang makamit ang UN Sustainable Development Goal 4 (equitable and inclusive education for all) kailangan ituring na kalamangan, at hindi bilang kabawasan, ang ating mga lokal na wika. Likas at normal para sa isang bata na matutong magbasa sa wikang karaniwang ginagamit sa kanyang tahanan at komunidad. Ang pagsuspinde sa MTBMLE ay pagbabalik sa abnormal at kolonyal na patakarang bilingguwal ni Corpuz( Ministri ng Edukasyon Order 74 , s.1974), na sisira ng mga nakamit na kabutihan sa pagtataguyod ng 1987 Konstitusyon at iba pang mga batas sa wika sa edukasyon.

Mahirap ang mga suliranin sa pagsasanay ng 1 milyong mga guro sa MTBMLE at pagwawaksi ng kaisipang parokyalismo. Bilyon-bilyon piso ang gagastusin sa teacher training ng mga guro at pagbuo ng mga aklat-aralin para sa 30 milyong estudyante. Ngunit panandalian lamang ang mga ito at magtatapos rin oras na magamay na ang paggamit ng unang wika ng bata sa pagtuturo. Kailangan pagdaanan ito sa pagbalikwas ng 120 taong sistema ng edukasyon na itinataguyod ng pilosopiya ng “benevolent assimilation” ni McKinley. Nagawa ito ng mga Israelita para sa wikang Yiddish at ng mga -Welsh-para sa wikang Welsh (The endangered languages that are fighting back, Preston Street Films, June 20,2023, bbc.co.uk) Kaya rin natin ito sa Pilipinas, kung gugustuhin natin.

Ang mga may anay ang isipan ay nagbanta na mawawala ang “kalamangan sa pagsasalita ng Ingles” ng ating mga migranteng manggagawa (may hawak na mga trabahong 3D= dirty-dangerous-domestic; na humihingi ng kabayarang emosyonal at sikolohiyal sa pamilya ng OFW ), at sa industriya ng BPO (na mawalang galang sa mga call center agents, ay “dead end jobs”) kung ipapatupad ang MTBMLE.Lumang tugtugin na ito. Sa ginawang tantya ni Steve Walters , lumabas na ang MTBMLE sa edukasyon ay nakapagpapatapos ng mas maraming propesyonal at iba pang mga trabaho na may mataas na kasanayan. Magkakaroon ito ng napakalaking epekto sa pagbabawas ng kahirapan sapagkat pinapalaki nito ang socio-economic middle class na hinango sa kahirapan. Hugis parihaba na nakatindig ang magiging anyo ng lipunan na nagpapahiwatig ng dali ng pag-angat sa buhay, hindi isang piramid na malawak at mataba ang ibabang pundasyon sa dami ng mahirap at matulis ang tuktok dahil kakaunti ang mayaman na kay hirap abutin.

Sinabi ni Bro Andrew Gonzales ,FSC , ginagalang na linguwistiko at dating Kalihim ng Edukasyon na “ hindi na gaanong mahalaga sa akin ngayon ang trabaho sa ibang bansa o ang kakayahan ng mga Pilipino na makipagkumpitensya sa akademya sa ibang bansa (ang bilang nila ay maliit lang), hindi natin dapat igayak ang buong sistema ng edukasyon para sa mga intelektwal at may kayamanan; kaya nilang pangalagaan ang kanilang mga sarili gaya ng lagi nilang ginagawa sa buong kalawakan at panahon….kailangan natin ang Ingles para sa ating mga intelektuwal at iskolar, ngunit hindi lahat ng Pilipino ay nangangailangan nito.” Imbes na manlibak ang Senado at Kongreso, itodo nila ang pondo sa pagpapatupad ng MTBMLE upang sa wakas ay mangibabaw ang interes ng masang Pilipino.

AUTHOR PROFILE

Magi Gunigundo