Helicopter nag-emergency landing dahil sa saranggola
ISANG private helicopter ang nag-emergency landing matapos sumabit sa nylon cord ng isang saranggola nitong Huwebes sa Sta Lucia, Trinidad, Guindulman, Bohol.
Batay sa inisyal na ulat ng PNP, naganap ang insidente dakong 11:30 a.m. sa nasabing lugar.
Patungo sana ang helicopter na pag-aari ng M. Lhuillier pawnshop sa Siargao nang maganap ang insidente.
Habang nasa himpapawid ay napansin ng piloto na hindi normal ang pag-ikot at paglipad ng helicopter kaya’t nagdesisyon itong mag-emergency landing.
Napag-alaman na nasa 2,000 talampakan na ang taas ng lipad ng helicopter nang masabit sa nylon cord ng saranggola ang likurang bahagi nito.
Walang naiulat na nasaktan o nasugatan sa insidente.
Nang matanggal ang nylon cord sa helicopter ay muli itong lumipad patungo sa kanyang destinasyon.