BBM: Tagumpay ng NTF-ELCAC matutunaw sa budget cut
NANGANGAMBA si Presidential aspirant Ferdinand “Bongbong” Marcos, Jr. na posibleng mabalewala ang pinaghirapan at magandang nasimulan ng National Task Force to End Local Communist Armed Conflict (NTF-ELCAC) dahil sa pagtapyas ng P24 bilyon sa pondo nito para sa 2022.
Ayon kay Marcos, standard-bearer ng Partido Federal ng Pilipinas (PFP), nalulungkot siya sa pagkatapyas ng Senado sa pondo ng naturang ahensya dahil saksi siya sa naging tagumpay nito sa pagsugpo ng insurhensiya sa bansa partikular ang paglaban sa teroristang New People’s Army.
Mula sa proposed budget na P28.12 bilyon, tinapyasan ito ng Senado ng aabot sa P24 bilyon kaya pagkakasyahin lamang ng NTF-ELCAC ang P4 bilyong pondo na inilaan sa kanila para sa taong 2022.
“Nakapanghihinayang na baka mabalewala at masayang lamang ang magandang nasimulan ng ahensya. Batid natin na kailangan ng sapat na pondo para masugpo ang insurgency na limang dekada na nating nilalabanan,” ayon sa pahayag ni Marcos.
Bagama’t aminado si Marcos na dapat pagtuunan ng pansin ang pondo sa paglaban sa Covid-19, iginiit nito na dapat ding bigyang pansin ang pondo para sa paglaban sa mga kaaway ng gobyerno.
Ayon sa talaan ng NTF-ELCAC, aabot sa 882 barangay sa bansa ang idineklarang ligtas na sa panganib mula sa NPA mula 2016 hanggang 2019.
Nitong nakaraang taon, mayroong P16.44 bilyong pondo ang ahensya na karamihan ay napunta sa flagship project ng task force na tinawag na Barangay Development Program (BDP) kung saan nagbibigay sila ng insentibong P20 milyon sa bawat “cleared barangay,” para sa development package nito, kabilang ang pagpapagawa ng mga farm-to-market road, health stations, classrooms, water sanitation systems, rural electrification at iba pang programang pangkabuhayan.
“Kung matitigil ang mga ito, nakakatakot isipin na ang mga barangay na nalinis na sa mga rebelde ay muling magbalik sa dating gawi nila na paglaban sa pamahalaan. Kaya dapat ay pag-isipan itong mabuti ng ating mga mambabatas,” paliwanag ni Marcos.
Dagdag pa ni Marcos, suportado niya ang anumang kampanya ng pamahalaan para wakasan ang insurhensiya sa bansa.
AUTHOR PROFILE
Inauguration
