Advisory sa ruta ng ‘Bekshie ng Maynila’ inilabas
NAGBIGAY na ng direktiba ang Pamahalaang Lungsod ng Maynila sa ruta ng idaraos na parada at konsiyerto para sa “Bekshie ng Maynila” – Manila Summer Pride 2023, Linggo Abril 16.
Iniutos na ni Manila Police District (MPD) Director P/BGen. Andre P. Dizon sa pamunuan ng Manila District Traffic Enforcement Unit (MDTEU) na magpatupad ng traffic rerouting sa Maynila.
Base na rin sa Department of Tourism, Culture and Arts o DTCA ng Manila City Hall, ang parade route ay magsisimula sa Arroceros Forest Park; pagkatapos ay diretso sa Antonio Villegas Street; kaliwa sa Natividad Lopez St.; diresto sa San Marcelino St.
Magpapatuloy sa kanang nahagi naman ng Ayala Boulevard; kanan sa Taft Avenue; kanan sa Antonio Villegas St.; kaliwa sa Cecilia Munoz St., hanggang sa makarating sa Bonifacio Shrine.
Magsisimula ang parada alas-4 ng hapon at magkakaroon ng konsiyerto kung saan tampok ang iba’t-ibang artists.
Ang “Bekshie ng Maynila” ay sinimulan noong 2019 ni dating Manila Mayor Isko Moreno.
Nakatutok ang pagdiriwang para sa mga kababayang miyembro ng LGBTQIA+ (Lesbian, Gay, Bisexual, Transgender, Queer, Intersex, and Asexual) organization, at para maisulong sa “equality” at “inclusivity” at iba pa.