Pagpapahalaga ng Miss Universe Philippines sa mga Wikang Filipino
BINABATI natin ang Miss Universe Philippines sa kanilang FB post na hinihikayat ang lahat ng mga sasali sa marangal na pagtatanghal na ipahayag ang kanilang mga sarili sa wikang nais nila higit sa lahat.
Sinabi sa FB post na “kung minsan, ang linaw ng kanilang diwa, at bayo ng kanilang tugon ay lumalabo at humihina ang dating dahil sa pagpupumilit na ipahayag ang sarili sa tumpak nagramatikang English.”
Sinabi sa FB post na,” dapat ipagmalaki ang katutubong wika.
Bagama’t ayos lang gamitin ang English, hindi masama na mag-Tagalog, Waray, Ilocano, Bicolano, Hiligaynon, Kapampangan, Chavacano, at iba pang Filipino language.” Mas klaro at nananatili pa rin ang yumi ng kalahok na gagamit ng wikang mula sa kanyang puso. Binabasag ng Miss Universe Philippines ang mapangmaliit na pagtingin ng maraming Pilipino sa mga taong hindi marunong mag-English.
Ang unang Miss Universe Pageant ay nagsimula noon 1952 na pinanalunan ni Armi Kuusela ng Finland. Marami sa mga sumunod na nagsuot ng korona ay galing sa iba’t ibang kontinente (Latin/South America, Europa, Asia at Africa) na hindi English ang dominanteng wika. Kabilan dito si Amparo Muñoz ng Espanya na nagwagi noon 1974 na kinoronahan dito mismo sa Pilipinas.
Sa question and answer portion, si Senorita Amparo ay nangailangan ng interpreter para isalin ang tanong at sagot mula English sa Espanyol. Sa kasaysayan ng Miss Universe, hindi panukat ng talino at kagandahan pangloob at labas ang pagsasalita ng wikang English sapagkat isa lang ito samaraming wika sa mundo at lahat ng mga wika ay pantay-pantay ng halaga, bagamat taliwas ito sa baluktot na pa-iisip ng maraming Pilipinong pango na parang aso nangumingiyaw kahit hindi naman pusa.
Hindi tulad ng ibang mga bansa sa Asya na di marunong mag-English ngunit ang niluluwas ay mgagamit at produkto na likha nila, ang niluluwas ng Pilipinas ay tao. Nananatili tayong service economy na umaasa sa U$40 Bilyon remittances ng mga OFW na nagtitiis mawalay sa pamilya dahil walang oportunidad kumita ng disente sa Pilipinas para mabigyan ang pamilya ng maginhawang bukas. Marunong ngang mag-English ang OFWs, subalit ang trabaho nila ay tinaguriang 3D- domestic, dirty, and dangerous. Mga Ingleserong utusa ng empleyado ng mga banyagang di marunong mag-English ang kinalabasan nila.
Dapat rin natin iugnay ang usapin ng paggamit ng taal na wika sa edukasyon ng Pilipino. Maliwanag sa PISA 2018 at 2022 na lamang ang batang may edad 15 taon nagamit ang Filipino sa bahay sa pagsusulit sa reading, mathematics at science. Noon pa kasing 1925, sinabi nasa Monroe Report na dehado ang batang Pilipino sa kanyang edukasyon kung patuloy na gagamitin ang wikang English sa paaralan. Matigas ang ulo ng mga may responsibilidad sa edukasyon kaya’t kulelat ang Pilipinas sa lahat ng mga bansa sa PISA.
Ang bayo ng deklarasyon ng Miss Universe Philippines ay dinig sa buong kapuluan. Makatulong sana ito sa pagkawala ng kabaliwan ng panlilibak sa di-marunong mag-English dahil sa maling pagpapalagay na ang korona na nagpapahalaga sa pagkatao ng Pilipino o Pinoy Pride ay nasa pagiging matatas sa wikang English na inampon na wika ng mga Pinoy na may kapangyarihan at mayayaman lamang. Nararapat ipasuot ang korona ng pagpapahalaga sa iba’t ibang mga taal na wikang Filipino na kumakatawan sa paniniwala at kultura ng mga matuwidna Pilipino.
Sa darating na panahon, masarap saksihan ang mga Pilipina na kinokoronahan na Miss Universe na hindi kinahiya, bagkus ay ipinagmalaki, na magsalita ng Tagalog, Binisaya, Ilokano, Kapampangan at iba pa sa question and answer portion na humihipo sa puso ng sambayanang Pilipino.
