Batangas Gov. Hermilando “Dodo” Mandanas at si Yeuhan Santi Yñigo Millo
Mandanas binati si Millo sa pagkapanalo sa WCOPA
BATANGAS CITY – Isang resolusyon ng pagkilala ang iginawad ng Pamahalaang Panlalawigan ng Batangas, sa pangunguna ni Batangas Governor Hermilando “Dodo” Mandanas, sa pamamagitan ng Sangguniang Panlalawigan kay Yeuhan Santi Yñigo Millo na nagwagi sa iba’t ibang larangan sa ginanap na World Championship of Performing Arts (WCOPA) sa Anaheim, California, Estados Unidos.
Si Millo, na tubong Tanauan City, ay isa sa mga kinatawan ng Pilipinas sa nasabing pandaigdigang patimpalak na naganap noong Hulyo 28 hanggang Agosto 6.
Itinanghal siya bilang WCOPA 2023 Semi-Finalist, Champion of the World Division Winner at Multi Gold Medalist/Gold Medalist-Latin Category, Gold Medalist-Opera Category, Silver Medalist-Rock Category, Silver Medalist-Modeling Casual, Silver Medalist-Modeling Formal at Bronze Medalist sa R&B/Soul/Jazz Category.
Sa resolusyong iniakda ni 3rd District Board Member Fred Corona, inilarawan ang pagkakapanalo ng Batangueñong taga-Tanauan na napakalaking karangalan hindi lamang para sa Lungsod ng Tanauan, kundi maging sa lalawigan ng Batangas at sa buong Pilipinas.
Dagdag pa rito, ang tagumpay ni Millo ay magsisilbing inspirasyon sa mga kabataan sa lalawigan at sa buong bansa na magsikap at magtiyaga upang makamtan ang tagumpay sa anumang larangan, saad ng resolusyon.
Naging katuwang ni Corona sa pagbuo ng resolusyon sina 6th District Board Member Lydio Lopez, 2nd District Board Member Arlene Magboo at Sangguniang Kabataan Provincial Federation Board Member Maria Louise Vale.
