UNDERSTANDABLE ang hindi pagsama ng six-month preggy na si Winwyn Marquez sa first fluvial Parade of Stars ng MMFF 2021 para sa entry niyang Nelia. Valid naman ang rason at para sa kanya, dalawang malaking blessings pa rin ang natanggap niya ngayong 2021.

Una ay ang pelikulang Nelia na first lead at title role niya na bonus pa nga na maswerteng nakasama sa MMFF this year at ang pangalawa naman ay ang parating na first baby nila ng non-showbiz boyfriend.

Si Winwyn mismo ang kumumpirma nito sa grand presscon ng Nelia held last Saturday.

“Yes, I’m actually expecting, I am pregnant,” pag-amin niya. “I tried to… siyempre, gusto ko muna siyang itago hanggang hindi pa sure lahat, ’di ba? I wanted to keep it for me and for my family to enjoy muna.

“Pero, siyempre, hindi ko rin naman in-expect na lalabas ang Nelia sa MMFF and I took it siguro as a sign na lang din na i-share kasi ang hirap din naman talagang itago.

“Kasi kailangan ko rin talagang tulungan ‘yung film to promote kahit online, gusto ko rin talagang makapunta sa presscon and be with everyone, ’di ba? Kahit medyo nag-a-adjust pa ‘yung body ko with everything.”

Nasa second trimester na siya ngayon ng pagbubuntis although hindi pa naman masyadong halata ang kanyang tiyan.

Tungkol sa ama ng kanyang dinadala ay hindi na nagbigay pa ng detalye si Winwyn dahil hindi naman daw ito artista.

“I’m happy. Kuntento naman ako with my relationship (with him), he’s such a private person kaya hindi ako makapag-share anything about him also, saka gusto ko rin na… siyempre, may part naman na amin lang. ‘Yun lang ‘yung sa amin ngayon.

“Pero happy ako, happy kami na we’re blessed with something I really prayed for, ’di ba? I’m not getting any younger. Tapos, bliness pa ako ng isa pang baby which is Nelia, na hindi ko rin naman in-expect na makakapasok (sa MMFF).

“So, blessing after blessing and happy ako na finally nasabi ko na sa inyo kasi ang hirap i-dodge ng question. ’Pag tinatanong ako, hindi ko alam kung ano ang gagawin ko kasi ang hirap mag-lie,” sabi ni Winwyn.

“I’m very, very excited. Dalawang Christmas gifts na I couldn’t ask for more talaga – Nelia, the first title role ko and then now, title role of being a mother,” dagdag ng aktres.

Samantala, kwento ni Winwyn, hindi siya makapaniwala na siya ang napiling bida ng A&Q Productions Film para sa pelikula.

Paulit-ulit nga raw niyang tinanong ang producers kung sure ba ang mga ito na siya talaga ang kinukuha. Never pa nga raw siya kasing nagbida and mostly ay kontrabida talaga ang kanyang ginagampanan.

Bagama’t sobrang challenging ang role ni Winwyn sa Nelia, thankful naman siya na mga batikang aktor ang kasama niya tulad nina Raymond Bagatsing, Mon Confiado at Lloyd Samartino na tinulungan daw siya at marami raw siyang natutunan sa mga ito.

Mula sa direksyon ni Lester Dimaranan, showing na ang Nelia sa mga sinehan sa Dec. 25. Kasama rin sa pelikula sina Shido Roxas, Ali Forbes, Sarah Javier at marami pang iba.