Speaker Romualdez, PH delegation inalok ng balut ni US Rep. Bera

NAG-COURTESY call si Speaker Ferdinand Martin Romualdez kasama ang kanyang delegasyon kay United States Rep. Ami Bera ng ika-anim na distrito ng California sa tanggapan nito sa Capitol Hill sa Washington DC.

Nasurpresa ang delegasyon ng Pilipinas ng maglabas ng balut at beer ang US lawmaker para sa kanila.

Ang pag-alok ni Bera ng beer at balut ay nagsilbing simbolikong pagpapakita ng kooperasyon at pagtutulungan ng Estados Unidos at Pilipinas.

Kasama ni Speaker Romualdez sa pakikipagpulong sina Senior Deputy Speaker Aurelio “Dong” Gonzales Jr., Deputy Speaker David “Jay-jay” Suarez, Majority Leader Manuel Jose “Mannix” M. Dalipe, Agusan del Norte Rep. Jose “Joboy” Aquino ll, House Secretary General Reginald “Reggie” Velasco, Ambassador to the US Jose Manuel Romualdez, Ambassador to Japan Mylene Garcia-Albano, at House Deputy Secretary Generals Jennifer “Jef” Baquiran, David Robert Amorin, at Sofonias “Ponyong” Gabonada Jr., at iba pang opisyal ng Kamara at embahada ng Pilipinas.

Tinalakay sa pagpupulong ang mga mahahalagang isyu at ang pagpapalakas sa diplomatikong relasyon ng dalawang bansa sa gitna ng geopolitical tension sa mundo.

Binigyan-diin ni Bera ang kahalagahan ng kooperasyon at pagrespeto sa soberanya ng bawat isa.

“It’s an important time in the region. None of us wants conflicts. We seek cooperation but we should respect each other’s sovereignty. We stand close to each other,” sabi ni Bera.

Bilang tugon, nagpahayag si Speaker Romualdez ng suporta kay Bera at sa distrito nito upang muling igiit ang pagkakaibigan ng Pilipinas at Amerika.

“Our gratitude and appreciation for your support, especially from your district as your home. We will not take that for granted. You are a true friend to the Philippines,” ani Speaker Romualdez.

Binigyan-diin ni Speaker Romualdez ang kahalagahan ng makasaysayang trilateral partnership sa pagitan ng Amerika, Japan, at Pilipinas.

“Who could have imagined that history would once again be made—the trilateral meeting of the U.S., Japan, and the Philippines? These are times that unite us, as we look towards the future,” wika pa ni Speaker Romualdez.

Umikot ang talakayan sa pagpapalakas ng kakayanang pangdepensa, pagpapa-unlad ng ekonomiya at pagpapalakas ng kalakalan sa pagitan ng dalawang bansa.

Natalakay din ang kahalagahan ng iba’t ibang inisyatiba gaya ng reauthorization ng Generalized System of Preferences, pamumuhunan sa green economy, at partnership sa mga global infrastructure project.

Sa gitna ng mga seryosong pag-uusap, ang konsepto ng “balut diplomacy” ang lumutang na magaan subalit makabuluhang paggalaw para sa palitan ng kultura.

Iminungkahi ni Bera ang paggawa ng isang memorandum of understanding na ipadadala sa embahada ng mga bansa na tatawaging “balut diplomacy.”

“We do jointly partnerships, English language. Let’s draft and forward it to the Embassy. Call it balut diplomacy,” sabi ni Bera.