SINABI ni Justice Secretary Jesus Crispin Remulla na pipigilan niya sa airport pa lang ang mga prosecutors mula sa International Criminal Court (ICC) na darating sa bansa upang imbestigahan ang mga pagpatay na naganap sa ilalim ng kampanya laban sa illegal na droga ng nakaraang administrasyon.

Sinabi ni Remulla sa One News na siya mismo ang maghahatid sa kanila sa unang eroplano pauwi sa kanilang bansa ng pinanggalingan.

“My position is I will meet them so they can take the first plane out. I will tell them: go home! You will do nothing in this country. If you have complaints, file it with us, ” ani Remulla.

Ipinaliwanag niya na mayroon naman maayos na justice system ang bansa at kaya nitong mag-conduct ng sariling imbestigasyon sa mga umano’y” unnecessary deaths” sa ilalim ng marahas na kampanya laban sa ilegal na droga.

Nauna nang sinabi ni Remulla na hindi puwedeng pumasok ang ICC sa Pilipinas upang “ipatupad ang sarili nilang batas.”

Ang pahayag na ito ay kasunod ng pagtanggi ng ICC sa kahilingan ng gobyerno ng Pilipinas na i-suspend ang imbestigasyon sa kampanya laban sa droga ng administrasyon ni Duterte.

Sinabi ng ICC appeals chamber na walang malakas na dahilan upang pagbigyan ang suspension, dahil hindi nagbigay ang gobyerno ng konkretong at malinaw na dahilan para sa kanilang apela.

Huling naghamon si Remulla sa ICC na una munang arestuhin si Russian President Vladimir Putin, batay sa kamakailang warrant of arrest na inilabas ng ICC laban kay Putin dahil sa diumano’y illegal na pagpapadala ng mga bata mula sa Ukraine patungo sa Russia.

“The ICC is the ICC, good luck to them, also if they want to arrest Putin, I’d like to see them do that because they’re big on words but let them do it first so we will believe that they can really do what they’re saying,” ani Remulla.

AUTHOR PROFILE

Hector Lawas