Moratorium sa student loan, itinulak ni Bong Go
BINIGYANG-DIIN ang kahalagahan ng edukasyon para sa mas maraming Pilipino, lalo sa mga kapos sa pinansiyal o pinakamahihirap na tinamaan ng pandemya, sinusugan ni Senator Christopher “Bong” Go ang Senate Bill No. 1864, mas kilala bilang “Student Loan Payment Moratorium During Disasters and Emergencies Act of 2022.”
“The COVID-19 pandemic has put the Filipino youth’s mental health and well-being under immense strain. Alam n’yo, umpisa pa lang ng pandemya, marami na pong naiulat na nakaka-experience ng depression. Umpisa pa lang ng krisis, talagang maraming apektado lalo na sa mga estudyante at teachers to the point na tumataas rin ang kaso ng depression and, worse, suicide cases. Ganito po ang naging kalagayan sa COVID-19 crisis, ganito rin po ang kadalasang sitwasyon sa panahon ng kalamidad at krisis,” sabi ni Go sa kanyang co-sponsorship speech sa panukalang batas.
“Makatutulong po sa ating mga kabataan at kanilang mga pamilya na mabigyan sila ng palugit sa pagbayad ng student loans. Hangga’t maaari bawasan na natin ang iniisip nila,” iginiit ng senador.
Ang panukala ay naglalayong protektahan at itaguyod ang karapatan ng lahat ng mamamayan sa de-kalidad na edukasyon sa lahat ng antas at tiyaking ang edukasyon ay magagamit ng lahat.
Para sa kadahilanang ito, dapat pahintulutan ang pagpapaliban ng koleksyon ng pautang sa mag-aaral sa makatwirang panahon o sa simula at pagkatapos ng sakuna at iba pang emerhensiya.
Idinisenyo rin upang pagaanin ang pasanin ng mga pautang sa mag-aaral, ang panukalang batas ay magkakaloob ng moratorium sa pagpapatupad ng pagbabayad, singilin, at mga gastos na may kaugnayan sa mga programa sa pautang ng mag-aaral para sa Higher Education and Technical-Vocational Education and Training (TVET).
Nakasaad sa panukalang batas na “The imposition of student loan payment moratorium shall not prohibit students from voluntarily waiving the benefit of the moratorium on student loan payments.”
Sasaklawin nito ang mga mag-aaral na naka-enroll o naninirahan sa mga barangay, munisipalidad, lungsod, lalawigan, o rehiyon na nasa ilalim ng State of Calamity o State of Emergency na idineklara ng Pangulo ng Pilipinas o ng lokal na sanggunian.
Sinabi ni Go na sa nakalipas na 6 taon, pinaigting ng administrasyon ni dating Pangulo Duterte ang pagtiyak na walang maiiwan sa de-kalidad na edukasyon. Ang Universal Access to Quality Tertiary Education Act ay nagbigay-daan sa mas inklusibo at patas na edukasyon.
Samantala, isa rin si Go sa nagsusog ng Senate Bill No. 1360 na layong palawakin ang saklaw ng tertiary education subsidy (TES) sa pamamagitan ng pag-amyenda sa Republic Act No. 10931 o Universal Access To Quality Tertiary Education Act.
Pinalawak ng panukalang batas ang pamantayan sa pagiging karapat-dapat sa pag-avail ng TES upang isama ang mga kapus-palad pero may kakayahang akademikong mga mag-aaral na mag-enrol sa kanilang unang undergraduate post-secondary tertiary education program sa private higher educational institutions (PHEIs) at technical-vocational institutions (TVIs).
