NASA 14 sa 57 bills ang aprubado na sa Legislative-Executive Development Advisory Council (LEDAC).

Ito ang napag-alaman sa ikaapat na LEDAC meeting ni Pangulong Ferdinand “Bongbong” Marcos Jr.

Ayon kay Pangulong Marcos, binalikan ng council ang progreso ng LEDAC-Common Legislative Agenda (CLA) na binubuo ng 57 na panukalang.

Nangako si Senate President Juan Miguel Zubiri kay Pangulong Marcos na ipapasa ang lahat ng panukalang batas na itinutulak ng administrasyon.

“Magandang balita, marami dito sa request ng ating Pangulo, sa LEDAC nga na-approve na namin both Houses of Congress at nasa final stages na.

Either pirma na lang ng Pangulo, or nasa Bicameral Conference Committee Meetings na lang, which is going to be a law very, very soon,” pahayag ni Zubiri.

“So, mayroon pa kaming, of course, utang dahil hindi pa namin natatapos. But we committed to the President all 23 measures, hopefully will be done by June before the Senate break or sine die break.

So ‘yan ang commitment namin sa House of Representatives together with the President. But we’re on track to pass all of these by June,” dagdag ni Zubiri.

Ayon pa kay Zubiri, 15 sa panukalang batas ang matatapos bago ang sine die adjournment ng Senado habang ang walong natitirang panukalang batas ay maipapasa sa Hunyo.

Sa panig ni House Speaker Martin Romualdez, sinabi nito na naisumite na sa Senado ang lahat ng LEDAC priority measures.

“At ‘yung dahilan kung bakit nauna po kami kaya kailangan tapusin naman natin talaga yung House bago i-akyat natin sa Senate.

Kaya parati nating tinutukan ‘yung ating mga LEDAC priority measures para hindi madedelay ang deliberasyon sa Senate kaya parating–hindi naman sa minamadali pero ino-overtime talaga natin sa House,” pahayag ni Romualdez.

Kabilang sa 15 na prayoridad na panukalang batas na target na maipasa ang Amendments to Anti-Agricultural Smuggling Act/Anti-Agricultural Economic Sabotage Act, Self-Reliant Defense Posture Act, Philippine Maritime Zones Act, Real Property Valuation and Assessment Reform Act, Philippine Ecosystem and Natural Capital Accounting System (PENCAS) at ang Negros Island Region Act.

Nasa listahan din ang Anti-Financial Accounts Scamming Act, Value Added Tax on Digital Services, Amendments to the Government Procurement Reform Act, Blue Economy Act, Waste-to-Energy Bill, Mandatory Reserve Officers’ Training Corps (ROTC) and National Service Training Program (NSTP), Unified System of Separation, Retirement, and Pension of Military and Uniformed Personnel, E-Government Act/E-Governance Act at Academic Recovery and Accessible Learning (ARAL) Program Act.

Sa 57 ma LEDAC bills, 14 ang naisabatas na habang 43 pa ang natitira.

Kabilang sa mga naging batas na ang SIM Card Registration Act, Postponement of Barangay/SK elections, Strengthening Professionalism in the AFP, New Agrarian Emancipation Act, Maharlika Investment Fund, Trabaho Para sa Bayan Act, Public-Private Partnership Code of the Philippines, Regional Specialty Centers, Automatic Income Classification of LGUs, Internet Transactions Act, Ease of Paying Taxes Act, Tatak Pinoy (Proudly Filipino) Act, Philippine Salt Industry Development Act at New Philippine Passport Act.