Nathalie, game mag-all the way sa Vivamax
BALIK-’PINAS at balik-showbiz ang sexy star na si Nathalie Hart matapos ang isang taong pagbabakasyon at madalas na pamamalagi sa Australia.
Katunayan, pumirma siya ng three-picture contract sa Viva Films, kung saan natapos na rin niyang gawin ang Kunwari… Mahal Kita na showing na sa mga sinehan nationwide bukas, March 15.
Kasama ni Nathalie sina Joseph Marco at Ryza Cenon sa pelikulang idinirek ni Roderick Lindayag na may premiere night sa SM North EDSA The Block ngayong Martes.
Ginagampanan niya sa movie ang papel ni Cindy Soriano, ang workaholic at career-oriented wife ni Joseph.
Pumayag siyang gawin ang Kunwari… Mahal Kita dahil hindi naman daw sexualized ang papel niya rito.
Dahil unang nakilala bilang sexy star, wala namang nakikitang problema si Nathalie sakaling alukin muli siya na magpaseksi ng Viva sa Vivamax.
Pero sabi niya, “But the thing is with the films that I did before na sobrang sexy din talaga, what is important for me is the storyline. ‘Pag maganda ‘yung storyline, it doesn’t really bother me if I have to go all the way with some skin, but that’s about it.
“For me, it’s important na maganda ‘yung role, maganda ‘yung kaeksena ko, sino ‘yung artista, because if it’s just for the purpose of just taking off your clothes, why? Why do I have to do that? Parang ‘yun ‘yung point ko. But I understand. Siyempre, nagawa ko na ‘yun dati, madali na lang ‘yun gawin ulit. Pero parang like if I can do something like ‘yung mga pelikula ko dati, I would do it in a heartbeat. It’s not gonna be a problem for me,” patuloy niya.
Bago nagpahinga sa limelight, naibalita ni Nathalie ang engagement nila ng foreigner fiance niyang si Brad Robert.
Napag-uusapan nila ang kasal pero ayon sa kanya, hindi sila nagmamadali. Pareho pa silang busy ni Brad sa ngayon kaya tine-take nila ang kanilang time bago mag-settle down.
“Mga isang taon pa,” diin ni Nathalie, na abala rin sa pagre-rebrand ng kanyang GayaTree Organics business.
