LAYUNIN ng International Women’s Day na itaguyod ang mahalagang papel ng kababaihan sa ating pamilya at lipunan, kilalanin ang mga hamon at diskriminasyon dahil sa kasarian na ugat ng hindi pagkakapantay at palakasin ang kilusan tungo sa parehas na pagtingin sa babae at lalake pagsapit ng 2030.

Sa pagbabalik-tanaw, kapansin-pansin ang pagbabagong panlipunan sa mundo gamit ang perspektibo ng kababaihan. Sa loob ng isang siglo, nabalikwas ang pagtingin at pagtrato ng lipunan sa mga babae na tinuturing na mababang klase ng mamamayan kumpara sa mga lalake, walang pagkakataon magkatrabaho na may suweldo, hindi pinapapasok sa saradong pintuan ng mga kolehiyo at pinagbabawalan sa pampublikong opisina, at walang karapatang bumoto. Bagama’t ang mga kababaihan ay nananatiling dehado pa rin sa lipunan, ang kilusan tungo sa pagkakapantay-pantay ng kasarian ay umarangkada ng husto sa nakalipas na 100 taon.

Para sa Abril hanggang Setyembre 2021, 1.83 milyon ang mga OFWs na nagtrabaho sa ibang bansa. 60.2% o 1.10 milyon sa kanila ay mga babae. At 64.8% ng mga Pinay OFW ay papasok sa mga “elementary occupations”: domestic helper, janitorial worker, kitchen crew at messengerial courier, na nagbibilad sa kanila sa abusong sekswal at pisikal dahil tinatrato silang alipin ng mga amo na may ibang kultura.

Mayroon tayong 140,000 sundalo, at 8,000 ay babae o 2% lang ng kabuuan (Marso 2020) . Para sa kapulisan, mula sa 169,955 pulis, 37,157 ang babae o 17.94% ng kabuuan( Cabalzar, PDI, Oktubre 2022). Hindi makakaila ang pagbabago ng numero na dati rati’y walang kababaihan sa dalawang serbisyo noon 1920s.

Bagamat lamang pa rin ang lalaki sa hanay ng mga mayor, gobernador, kinatawan at senador, nakakadalawang babaeng Pangulo at Bise-Presidente na ang Pilipinas. Ayon sa Korte Suprema ( Marso 2022) mas marami na ang babaeng hukom sa mga korte na ang bilang ay 1,153 kumpara sa mga lalakeng hukom na 984 ang bilang.

Maraming bagay ang nag-ambag sa pangmatagalang pagbabagong ito. Marahil ang pinakamahalaga ay ang industriyalisasyon at pag-unlad sa teknolohiya ng kompyuter na nag-alis ng aspetong pisikal na hinihingi na mga gawain na pinapaboran ang lakas ng lalaki. Dahil sa teknolohiya ng reproductive health, ang buhay ng kababaihan ay hindi gaanong nagagambala ng hindi inaasahang pagbubuntis.

Ang mga reklamo ng sexual harassment sa trabaho ay mas sineseryoso ngayon kaysa noong nakalipas na henerasyon. Mayroon na rin Violence Against Women and Children Act na pinapayagan ang depensa ng Battered Woman Syndrome. Mayroon na rin parusa sa marital rape. Ang mga ito ay papalaganap na epekto ng Feminismo sa lipunan.

Itinataguyod ng Feminismo ang pagkakapantay-pantay sa lipunan ng kababaihan at kalalakihan at sinasalungat nito ang “patriarchy” at “sexism”, alisin ang karahasan laban sa kababaihan, at itinataguyod ang pagbibigay ng kontrol sa kababaihan sa kanilang pagbubuntis.

Mayroong tatlong uri ng feminism: ang liberal na feminismo ay naghahanap ng pantay na oportunidad para sa parehong kasarian; sinasabi ng sosyalistang feminismo na ang pagkakapantay-pantay ng kasarian ay darating sa pamamagitan ng pagpapalit ng kapitalismo ng sosyalismo sa isang marahas na paraan; at sinusulong ng radikal na feminismo ang pag-aalis ng konsepto ng kasarian at lumikha ng isang egalitarian at gender-free na lipunan.

Karamihan sa puna sa Feminismo ay nakadirekta sa sosyalista at radikal na mga anyo nito, habang ang suporta para sa liberal na feminismo ay laganap. Nakikita rin natin ang isang hindi mapag-aalinlanganang pagpapalit ng “mindset” ng tao. Noong 1977, 65% ng lahat ng mga nasa hustong gulang ang nag-endorso ng pahayag na “mas mabuti kung ang lalaki ang tagumpay sa labas ng tahanan at ang babae ang nag-aalaga sa tahanan at pamilya.” Noong 2012, ang bahaging sumusuporta sa pahayag na ito ay bumagsak nang husto sa 31% (NORC, 2013).

Karamihan sa mga lalaking kontra sa Feminismo ay ayaw magsuko ng pribilehiyong tinatamasa bilang lalaki. Ang ibang mga kalalakihan at kababaihan, na mula sa hindi mayaman at walang kapangyarihan, ay hindi nagtitiwala sa isang kilusang panlipunan (lalo na sa radikal na pagpapahayag nito) na umaatake sa tradisyonal na pamilya at tinatanggihan ang mga nakagawiang padron ng lipunan sa relasyon ng lalaki-babae sa loob ng maraming siglo marahil dahil sa pagkunyapit sa mga sulat ni Pablo. Kahinaan din ng Feminisno ang hindi pagpapahalaga sa tradisyonal na tungkulin naka-atang sa balikat ng babae na nagbubuntis at nag-aalaga ng anak. Binabalewala rin ng feminismo ang lumalaking pangkat ng ebidensya na magka-iba mag-iisip ,magpasya at kumikilos ang babae at lalake. Para sa akin, ang lalake at babae ay dalawang gulong ng isang karetela.Tagilid ang takbo ng sasakyan kung hindi parehas ang sukat ng mga gulong. Mabuhay ang Kababaihan!

AUTHOR PROFILE

Magi Gunigundo