NADAKMA ng mga pulis noong Martes ang lalaki na matagal nang hinu-hunting dahil sa pangmomolestiya ng menor de edad sa Marilao, Bulacan.

Sa report ni Valenzuela police chief P/Col. Salvador Destura, Jr. kay Northern Police District chief PBrig. Gen. Rizalito Gapas, tinimbog si alyas Ome dahil sa kinakaharap na kaso ng pangmomolestya sa menor-de-edad.

Natiklo si alyas Ome sa Beverly Homes I, Brgy. Prensa 2, Marilao, Bulacan matapos ang ilang buwang pagtatago.

Ikinasa ng Warrant and Subpoena Section (WSS) sa pamumuno ni Lt. Ronald Bautista at Northern Maritime Police Station ang operasyon laban sa akusado dakong alas-12:20 ng tanghali sa bisa ng warrant of arrest na inilabas ni Valenzuela Regional Trial Court (RTC) Acting Presiding Judge Mateo B. Altarejos ng Branch 172.

Para sa dalawang bilang na kasong Sexual Assault in relation to Sec. 5B ng R.A. 7610 o ang Special Protection Against Child Abuse. Exploitation and Discrimination Act ang warrant of arrest ng suspek.

AUTHOR PROFILE

Edd Reyes