Cindy, revelation sa ‘Adik Sa’Yo’
In fairness, may chemistry pala sina JM de Guzman at Cindy Miranda, mga bida sa pelikulang Adik Sa’Yo mula sa direksyon ni Nuel Naval under Viva Films.
Napanood namin ang Adik Sa’Yo sa premiere night last Tuesday at nag-enjoy kami sa pagka-feel-good ng movie at sa acting ng cast lalo na nga ang dalawang bida.
Of course, hindi na kami nagtataka sa kahusayan ni JM dahil magaling naman siyang aktor talaga. Pero ang rebelasyon sa amin ay si Cindy dahil pinatunayan niya na hindi lang paghuhubad ang alam niya. She can do wholesome films din at may talent sa drama at pagpapatawa.
Ginagampanan ni JM ang role ni Paolo, dating drug addict at nagsisikap magbago. Natural na natural ang acting niya lalo na nga sa mga eksena nila ni Cindy bilang si Joy na best friend niya at hindi niya nahahalatang in love na in love sa kanya.
Tawang-tawa kami sa hilarious scenes ni Cindy but at the same time, naiyak din kami sa kanya sa eksenang na-realize niya na hindi siya talaga mahal ni Paolo.
Kakaibang chemistry ang ipinamalas nina Cindy at JM at ito ay dahil pareho silang mahusay sa kani-kanilang role.
Very touching din ang mother and son conversation scene nina JM at Candy Pangilinan at naipakita ng aktres ang hirap ng isang ina kung paano i-deal ang ganitong klaseng problema sa anak.
Pati ang ending ay nagustuhan namin dahil hindi OA at hindi rin trying hard na magkaroon ng happy ending. To summarize, ito ‘yung klase ng pelikula na lalabas ka sa sinehan na nakangiti.
Kasalukuyan nang napapanood sa mga sinehan ang Adik Sa’Yo.
