Takbo hangga’t may lupa!
6 ‘illegal recruiters’ para sa Europa hinahanting ng NBI
ANIM na pinaghihinalaang illegal recruiters ang tinutugis na ng mga awtoridad matapos mangako na magbibigay ng mga trabaho sa Europa sa mga nagnanais na mangibang-bayan na Pilipino, na sa kalaunan ay hindi naman natupad.
Kinilala ang mga suspects bilang sina Maya Sanchez Luague, Ronnie Luague, Alexandria Luague, Ana Marie Sanchez, Jonathan Sanchez, at Victoria Sanchez Amon, na nahaharap sa mga kasong illegal recruitment at estafa sa Department of Justice (DOJ), na inihain ng National Bureau of Investigation-Anti-Organized and Transnational Crime Division (NBI-AOTCD).
Nagsampa ng reklamo ang mga complainants na sinabihan sila ng mga suspects, na mga opisyal at empleyado ng John McGregor Marineweld Training Inc. na matatagpuan sa 1697 President Quirino Avenue, Pandacan, Manila, na paalisin sila bilang welders sa bansang Slovakia.
Bawat complainants ay pinangakuan ng sahod na 1,800 Euros plus 400 Euros na meal allowance, na nagkakahalaga ng halos P130,000 kada buwan.
Inubliga umano ng mga suspects ang complainants na kumuha ng apat na maikling kurso (training courses) kapalit ng halaga na gagamitin umano sa “processing, line-up, at training fees.” Nakatipon ng kabuuang halagang P597,007 ang mga suspects mula sa mga nagreklamo.
Ngunit nagulat ang mga complainants nang malaman nila na hindi sakop ng halagang binayaran nila ang mga tiket ng kanilang eroplano at placement fees.
Samantala, kahit sinigurado ng mga suspects na hindi na kailangan ng karagdagang bayad sa kanila, hindi pa rin naipadala ang mga complainants sa Slovakia kahit na mahigit isang taon na ang nakalipas.
Humiling ang mga complainants na ibalik ang kanilang pera, ngunit hindi sumunod ang mga suspects, na nagdulot ng pinsala at pagkapinsala sa mga nagreklamo.
Natuklasan ng Department of Migrant Workers (DMW) – Philippine Overseas Employment Agency (POEA) na hindi awtorisado o lisensyado ang ahensiya ng mga suspects upang mag-recruit ng mga manggagawa para sa trabaho sa ibang bansa.
Naghain ng subpoena ang NBI sa mga suspects upang magpaliwanag sa kanilang panig tungkol sa mga paratang laban sa kanila, ngunit hindi sila nagpakita. Ang kanilang opisina ay sarado na, at hindi alam ang kanilang lokasyon.
Bilang resulta, naghain ng kaso ang NBI laban sa mga suspects para sa paglabag sa Republic Act No. 8042 o ang Migrant Workers and Overseas Filipinos Act of 1995 na binago ng RA 10022, at estafa.
