ROMUALDO: ALVAREZ PALUSOT
Sa freedom of expression alibi
PINURI ni Camiguin Rep. Jurdin Jesus Romualdo si Justice Secretary Jesus Crispin Remulla sa direktiba nito na imbestigahan ang panawagan ni dating Speaker Pantaleon Alvarez sa mga sundalo na iatras ang kanilang suporta kay Pangulong Ferdinand Marcos Jr.
Naniniwala si Romualdo na nagpapalusot lang si Alvarez sa hirit nitong “freedom of expression” upang matakasan ang kanyang “seditious” statement sa isang prayer rally sa Tagum City.
“Huwag na po tayong magpalusot. The former speaker very well knows that free speech is not absolute. One cannot make a seditious call or a libelous statement without facing the consequences,” ani Romualdo.
Nauna rito ay iminungkahi ni Romualdo sa Department of Justice (DOJ) na imbestigahan si Alvarez kaugnay ng paghikayat nito sa mga sundalo na alisin ang suporta kay Pangulong Marcos na malinaw na inihalal ng nakararaming Pilipino.
Sinabi naman ni Remulla na paiimbestigahan nito ang naging pahayag ni Alvarez kung ito ay papasok sa kasong sedisyon, o paghihikayat ng pag-aaklas.
“As a former lawmaker myself, I would like to remind Congressman Alvarez to act in accordance [with] the highest standards of ethics, morality and nationalism, and avoid remarks unbecoming of a member of the House of Representatives,” sabi pa ni Remulla.
Ipinunto ni Romualdo na hindi na mahihirapan ang DOJ sa gagawin nitong imbestigasyon dahil inamin naman ito ni Alvarez.
“There is ample evidence, including a recording of the remarks. In fact, there is now an admission from the former speaker. There is a defense-excuse-palusot as well,” dagdag pa ng mambabatas.
Umaasa naman si Romualdo na agad na maglalabas ang DOJ ng show cause order laban kay Alvarez.
Pinuri rin ni Romualdo, chairman ng defense committee ng Commission on Appointments, ang militar sa pagkilala at pagsunod sa chain of command at sa kanilang hindi pakikinig sa panawagan ni Alvarez.
