Ogie Diaz bagong santo sa Pilipinas
Matapos ang pagpapatunay mula kay Asia’s King of Talk Boy Abunda sa kanyang programa na “Fast Talk with Boy Abunda” noong Martes, Pebrero 6, na hiwalay na ang engaged couple na sina Bea Alonzo at Dominic Roque, kinikilalang “Patron Saint of Chismis” ngayon si Ogie Diaz.
Sa kanyang mga naunang pagbabalita, halos lahat ng mga showbiz couple na kanyang naunang sinabi na naghiwalay ay nagkatotoo: mula kina Kathryn Bernardo at Daniel Padilla o KathNiel, Kim Chiu at Xian Lim o KimXi, mag-asawang Jericho Rosales at Kim Jones, at huling-huli nga ay sina Bea Alonzo at Dominic Roque.
Sa kanyang entertainment vlog na “Ogie Diaz Showbiz Update,” ibinahagi ni Ogie na ayon sa kanyang source, hiwalay na nga raw ang BeaDom. At dahil sa kanyang matapat na pagbabalita, may ilan ngayong tumatawag sa kaniya na “Patron Saint of Chismis.”
Sa kanyang My Story sa Facebook, nagbigay ng komento si Ogie. Aniya, “Salamat po sa mga ‘sumasamba’ sa inyong lingkod. Hahaha! Wag n’yo po akong gawing patron ng mga marites.”
Isinawalang bahala naman ni Ogie Diaz ang pangba-bash sa kanya at naniniwala siya na pawang katotohanan lamang ang kanyang ibinabalita.
