‘Ajoomma’ ng Singapore at Korea, swak sa mga adik sa K-drama
IYAK, tawa. ‘Yan ang eksena sa press preview ng lighthearted family drama na Ajoomma, isang collaboration sa pagitan ng Singapore at South Korea na dinala ng TBA Studios sa bansa at magsisimulang mapanood sa mga sinehan ngayong Miyerkules, March 15.
Swak nga ang Ajoomma sa mga Pinoy na adik sa mga Korean drama.
Mula sa direksyon ng debuting Singaporean filmmaker na si He Shuming, kwento ito ng isang middle-aged, Korean-drama-obsessed na biyuda mula sa Singapore na pupunta sa Seoul sa kauna-unahang pagkakataon.
Ang hindi niya alam, ang nasabing palang biyahe ay magiging isang unexpected road sa self-discovery dahil dito niya madidiskubre kung ano ang talagang gusto niya sa buhay maliban sa pagiging anak, asawa at ina.
Ani Shuming, ang Ajoomma ay inspired ng totoong kwento ng sarili niyang ina na mahilig din sa Korean dramas.
Dagdag niya, “While the premise seems to be timely given the popularity of Korean pop culture sweeping through all of Asia and beyond, it merely serves as an undertone for the film, which is about a middle-aged Singaporean woman learning to navigate life beyond her duties as a mother, a housewife, and a caretaker.”
Bida sa Ajoomma ang veteran Singaporean actress na si Hong Huifang bilang “ajoomma” (Korean word for ‘auntie’) kasama ang South Korean actors na sina Kang Hyung Suk (Hometown Cha-Cha-Cha), Jung Dong Hwan (Uncontrollably Fond, Hotel del Luna) at Yeo Jin Goo (Moon Embracing the Sun and Hotel del Luna) sa isang special guest role.
Nagkaroon ng world premiere ang pelikula sa 27th Busan International Film Festival noong October 2022 at mula du’n ay nag-uwi ng iba’t ibang pagkilala kabilang ang apat na nominasyon sa 59th Golden Horse Awards.
Napili rin ang Ajoomma bilang entry ng Singapore sa Best International Feature Film ng 95th Academy Awards.
Produced ito ng Cannes award-winning director na si Anthony Chen (ILO ILO).
Ayon kay Chen, ang Ajoomma “reflects the unique way that Korean pop culture resonates with audiences across Asia and the world.”
Ganito rin ang sinabi ni TBA Studios president/COO Daphne Chiu, “Filipinos are very passionate about Korean culture and media. We feel that audiences here especially women of all ages would be able to relate to this film. It’s a heartwarming story perfect for families.”
