Isko nanguna bilang NCR local chief executive — survey
MATAGUMPAY na nakakuha si Manila City Mayor Isko Moreno ng pinakamataas na approval rating sa mga Metro Manila Mayors na pumalo sa 88%.
Pasok rin sa Top 5 sina Mayor Joy Belmonte ng Quezon City (82%), Vico Sotto ng Pasig (81%), Toby Tiangco ng Navotas (80%), at Menchie Abalos ng Mandaluyong (78%).
Ang independent, non-commissioned survey ay isinagawa ng RP-Mission and Development Foundation Inc. (RPMD), kung saan kinapanayam nito ang may 5,750 respondents, na sinabihang i-evaluate ang kani-kanilang alkalde hinggil sa kanilang overall job performances, ayon kay Dr. Paul Martinez ng RPMD.
Samantala, kabilang naman sa Top 6-10 sina Oca Malapitan ng Caloocan (72%), Rex Gatchalian ng Valenzuela (71%), Marcy Teodoro ng Marikina (70%), Abby Binay ng Makati (68%), at Francis Zamora ng San Juan (67%), na pawang nakakuha rin ng exemplary ratings.
Ang iba pang lungsod, maliban sa Pateros (48%) at Malabon (46%) ay napanatili ang kanilang high approval ratings.
Ang mga survey representatives mula sa iba’t ibang lugar ay tinanong rin kung sino ang kanilang nais na maging susunod na alkalde sa kani-kanilang lungsod.
Sa NCR First District, si Manila Vice Mayor Honey Lacuna ay nakakuha ng 43% laban kay Cong. Manny Lopez na may 41% score lamang.
Sa NCR second district, nanguna si Belmonte na incumbent mayor ng Quezon City sa puntos na 52% laban sa kanyang mga posibleng makatunggali sa halalan na sina dating Mayor Herbert Bautista na may 21%, at Cong. Mike Defensor na may 20%.
Sa Pasig City, nakakuha si Sotto ng 67% voters’ preference laban kay Vice Mayor Iyo Bernardo na mayroon lamang 28% vote habang sa San Juan, si Zamora ay nakakuha ng 65% result laban kay Janella Estrada na may 32% points lamang.
Sa NCR third district, si Cong. Along Malapitan na tatakbo sa pagka-alkalde sa Caloocan ay nakakuha ng 69% laban kay Cong. Egay Erice na may 30% score sa survey habang sa Malabon City, si Ricky Sandoval II ay nagkamit ng 47% point laban kay Enzo Oreta na may 36% naman.
Sa NCR fourth district, si Cong. Ruffy Biazon ay nakakuha ng 53% laban kina dating Mayor Aldrin San Pedro na may 21% at Marc Red Mariñas na may 19% score, sa Muntinlupa City mayoral race.
Si Cong. Gus Tambunting ay nagkamit ng 50% tally laban sa incumbent Cong. na si Eric Olivarez sa puntos na 43% para sa 2022 Mayor sa Parañaque City.
Ang survey ay isinagawa mula September 3-15, 2021, at ang mga respondents dito ay pawang registered voters na nagkakaedad ng 18-70 years old, at lahat ay residente ng Metro Manila.
Ang sampling margin of error ay nasa ±2 percent at may 95% confidence level. Lahat ng respondents ay randomly selected at ang bilang ng respondents kada lungsod ay allocated proportionally base sa official voting population data.