US-Aussie pinabalik sa US dahil sa sangdamakmak na sex crimes
IPINAGMALAKI ng Bureau of Immigration (BI) na napigilan nila ang pagpasok sa bansa ng isang Australian-American national na wanted sa US dahil sa sangkaterbang sex offenses.
Ayon kay Immigration Commissioner Norman Tansingco, sumakay ang 54-anyos na si Robert David Fenton pabalik sa Los Angeles noong Abril 23 matapos tanggihang makapasok sa Ninoy Aquino International Airport (NAIA) Terminal 1.
Tinangka ni Fenton na makapasok sa bansa noong April 14 mula sa Brisbane, Australia.
Na-deny entry si Fenton dahil sa positive hit sa Interpol derogatory system na nangangahulugan na mayroong red notice laban sa kanya dahil sa pagiging wanted dahil sa sex crimes sa US.
Agad siyang inilagay sa Immigration blacklist bilang undesirable alien.
Ayon kay BI-Interpol unit acting chief Jaime Bustamante, wanted si Fenton sa US dahil sa aggravated indecent assault laban sa 16-anyos na biktima.
Kinasuhan din ito ng corruption of minors at indecent assault, involuntary deviate sexual intercourse at statutory sexual assault laban sa isa pang 16-anyos.
Inilarawan ni Tansingco ang pinalayas na Kano na criminal sex offender na dapat managot sa paulit ulit na pang-aabuso at pangmomolestiya ng mga bata.
“We are determined to ban the entry of these unwanted aliens as their presence here poses a serious risk to our women and children,” saad ni Tansingco.
