LTO OIC Vera Cruz ipapakulong ang fixers
IPAPAKULONG ang mga fixers.
Ito ang mensahe ni Land Transportation Office (LTO) Officer-In-Charge and concurrent Executive Director Atty. Romeo G. Vera Cruz matapos maaresto ang isang grupo ng online fixers noong Hulyo 6, 2022.
Ayon kay Cruz, isinagawa ang pinakabagong operasyon ng LTO ng pinagsanib na puwersa ng LTO Investigation and Intelligence Division (IID) na pinamunuan ni dating Department of Transportation (DOTr) Director for Investigation Service Renante Melitante at Quezon City-Diliman Anti-Cybercrime Team (QCDACT) na pinangungunahan ni PLT Michael E. Bernardo.
Nagresulta ang operasyon para maaresto ang grupo na nag-aalok ng non-appearance renewal ng rehistro ng sasakyan sa pamamagitan ng online payment at meet-up.
Nakatira ang mga suspek sa Bulacan at Quezon City.
Sinabi ni Vera Cruz na nakipag-transaksiyon ang kasapi ng LTO-QCDACT Joint Task Force sa mga suspek para sa non-appearance renewal ng sasakyan sa pamamagitan ng Messenger app.
Ayon kay Melitante, nasa kostudiya na ng QCDACT ang mga suspek dahil sa umano’y paglabag sa Article 315 ng Revised Penal Code on deceit/swindling (estafa) at Republic Act (RA) No. 11032 o Ease of Doing Business and Efficient Government Service Delivery (EODB EGSD) Act of 2018 na parehong may kaugnayan sa Section 6 of RA 10175 (Cybercrime Prevention Act of 2012).
Sinabi ni Melitante na sasailalim ang mga suspek sa Inquest Proceedings sa Quezon City Prosecutor’s Office.
Pinayuhan ni Vera Cruz ang LTO clients na diretsong magtungo sa kanilang tanggapan at hindi sa kaduda-dudang social media accounts at indibidwal para sa kanilang proteksiyon.
“To all LTO clients, please refrain from patronizing fixers for your own protection. You may also be equally liable under the law,” ani Vera Cruz.
Nagbabala rin ang LTO OIC sa mga indibidwal at mga kawani na huwag pumasok sa fixing activities dahil kakaharapin nila ang batas.
“The LTO will relentlessly operate against these spurious individuals in our effort to clean up the bureaucracy to protect our clients,” pagtatapos ni Vera Cruz.
