Call center agent tiklo sa ‘qualified theft’
ARESTADO ng mga operatiba ng Manila Police District (MPD) ang isang 25 anyos na call center agent dahil sa kasong three counts ng qualified theft nang isilbi ang arrest warrant nito, matapos mamataan sa Market! Market! Mall sa Taguig City, madaling araw nitong Miyerkules.
Ang suspek ay binata, at residente ng Barangay Buting, Pasig City.
Base sa ulat ni Police Lieutenant Colonel Rodel Borbe, commander ng MPD Baseco Police Station (PS) 13, bandang alas 5:00 ng madaling araw, nang matunton ang target sa naturang lugar.
Dito na inihain ang warrant of arrest na inisyu ni Presiding Judge Bibiano Colasito, ng Regional Trial Court, Branch 10 ng Maynila na may petsang Oktubre 18, 2022.
Pinangunahan ang operasyon ni P/Capt. Mel Soniega, hepe ng Station Warrant Section, kasama ang ilang operatiba at sa tulong ng isang impormante kaya nahuli ang suspek.
Nagpaabot naman ng papuri si “The Game Changer General” MPD Chief Police Brigadier General Andre P. Dizon sa mga kapulisan ng Baseco PS-13 sa pamumuno ni Borbe dahil sa patuloy na pagtalima sa programang “Simultaneous Anti-Criminality Law Enforcement Operations” (SALEO) at “Oplan Galugad.”
