Inilabas na ng ABS-CBN nitong Huwebes ang trailer ng Cattleya Killer, ang international drama series na pinagbibidahan ni 2020 Asian Academy Creative Awards Best Actor Arjo Atayde, na layuning ipamalas ang talento at kwentong Pinoy sa mundo.

Agaw-pansin ang trailer na itinampok agad ang bangkay ng isang babaing may bulaklak ng Cattleya sa mukha.

Gugulo sa isipan ng mga imbestigador ang kaso dahil naalala nila ang istilo ng serial killer na si Gene Rivera (karakter ni Aga Muhlach sa pelikulang Sa Aking Mga Kamay) na gumawa ng maraming karumaldumal na pagpaslang sa Maynila 20 taon na ang nakalipas.

Ipinakita rin sa trailer ang ilang mahahalagang eksena sa serye na angkop mula sa 1996 Star Cinema movie na Sa Aking Mga Kamay, kabilang na ang pagbabalik ni Joven (Christopher de Leon) bilang NBI agent na hahawak sa kaso at ang pag-uusap ni Joven at anak niyang si Anton (Arjo), kung saan sinabi ni Anton na hindi copycat ang bagong killer.

Kapansin-pansin din sa trailer na puno ng aksyon at nakakatakot na mga eksena ang Cattleya Killer na talagang bibihag sa atensyon ng mga manonood.

Makikita rin ang ibang co-stars ni Arjo tulad nina Jake Cuenca, Jane Oineza, Ria Atayde, Ricky Davao, Nonie Buencamino, Ketchup Eusebio, Frances Makil-Ignacio, Jojit Lorenzo, Rafa Siguion-Reyna at Zsa Zsa Padilla.

Samantala, makasaysayan ang naging premiere screening ng Cattleya Killer sa MIPCOM Cannes noong Oktubre 19 dahil ito ang unang Filipino drama na ipinalabas sa MIPCOM, ang pinakamalaking merkado ng mga palabas sa mundo.

Dumalo sa screening ang team mula sa ABS-CBN at co-producer na Nathan Studios Inc., kabilang na sina ABS-CBN International Production head Ruel Bayani, Arjo, Ria at ang kanilang mga magulang at co-producers na sina Sylvia at Art Atayde.

Puno ng pagpapasalamat si Arjo para sa Cattleya Killer.

Aniya, “It is such an honor to be part of this. It is such a learning experience. I just want to thank all Filipinos for actually finding their way to support us today. We will continue to inspire, to bring out the message, and to just keep doing what we’re doing.”

Pinuri ng netizens na nakapanood na ng trailer ang serye na mula sa ABS-CBN at Nathan Studios.

Sa ilalim ng direksiyon ni Dan Villegas ang Cattleya Killer na isinulat ni Dodo Dayao.

Executive producer naman ng serye si Direk Ruel.

Nakikipagsanib-pwersa rin ang ABS-CBN sa iba’t ibang partners upang mas makilala pa ang mga kwentong Pilipino at talento sa buong mundo.

Sumunod ang Cattleya Killer sa Almost Paradise, ang unang American TV series na kinunan sa Pilipinas.

Isa itong co-production ng ABS-CBN sa Electric Entertainment mula sa Hollywood.

Ang iba pang proyekto ng ABS-CBN International ay ang crime family series na Concepcion ni Sharon Cuneta at ang prison drama na Sellblock na pagbibidahan naman ni Jericho Rosales.