Default Thumbnail

2 abandonadong sasakyan nakita sa Batangas

October 28, 2023 Jojo C. Magsombol 266 views

NATAGPUAN ng mga pulis ang dalawang abandonadong sasakyan–isang Toyota Vios at sports utility vehicle (SUV)–sa bypass road sa Bgy. San Mateo, San Pascual, Batangas noong Biyernes.

Nakita ang mga sasakyan ng mga miyembro ng traffic patrol sa pangunguna ni P/SSg Rexon Marasigan Andal habang nagpapatrulya sa nasabing daan.

Ayon sa mga pulis, iniwan lang na nakaparada ang SUV at itim na Toyota Vios (NET 3763) sa bakanteng lugar ng kalsada.

Natagpuan sa loob ng Vios ang mga identification card ni Dierrah Lopez y Cajanding, ng Blk. 11 Lot 19, Pasong Buaya 2, Imus, Cavite, at bag na may laman na smart watch at P5,900 cash.

Humingi ng tulong ang mga rumespondeng tauhan ng San Pascual police sa mga opisyal ng barangay ng Bgy. San Mateo, San Pascual sa pamumuno ni Edelmar Adatu para tumayong saksi.

Nasa kustodiya ngayon ng San Pascual police ang dalawang sasakyan.

Makikipag-ugnayan ang mga pulis sa Batangas Provincial Highway Patrol Unit at Land Transportation Office para matukoy ang tunay na may-ari ng dalawang sasakyan

AUTHOR PROFILE