Yassi Pressman
Yassi Pressman, AP tumulong sa Cebu Odette victims
SA pangunguna ng aktress na si Yassi Pressman, nagtungo ang grupo ng AP sa ilang munisipalidad sa Cebu noong nakaraang linggo mula Pebrero 9-11, 2022 para mamahagi ng tulong sa mga nasalanta ng bagyong Odette noong Disyembre.
Unang pinuntahan ng AP Team at ni Yassi ay ang Argao, Dalaguete at Toledo kung saan nagsagawa ang grupo ng feeding programs sa tulong ng mga lokal na opisyal doon. Halos dalawang buwang makalipas na humagupit ang bagyong Odette, marami pa rin sa mga Cebuano ang hindi pa nakakabangon at unti-unti pa ring binabalik sa normal ang kanilang mga buhay. nagpamigay rin sila Yassi at ang AP Team ng libreng accidental insurance na may medical reimbursement sa mga piling miyembro upang makatulong sa mga Cebuano na maging handa sa maaaring maging aksidente sa hinaharap.
Nagtungo si Yassi Pressman at ang AP Team sa mga bayan ng isla ng Camotes – ang San Francisco, Pilar, Poro, at Tudela. Labis na ikinatuwa ng mga taga isla ng camotes ang paghatid ng mga relief goods sa kanilang isla. “Babalik at babalik po kami dito para maghatid ng tulong. Di po namin kayo nakalimutan kahit kailan at parang pangalawang tahanan na po namin ang Camotes,” sabi ni Ong sa mga taga-San Francisco ng Camotes. Si Ong ay dati nang naghahatid ng tulong sa mga taga-Camotes sa pamamagitan ng mga proyekto nitong Tulong Pangkabuhayan.
Ang #164AP team, na binansag ng mga Cebuano sa grupo, ay huling nagpunta naman sa Pardo, Cebu City noong biyernes. Sabi ni Pressman, “Isa po tayong pamilya sa AP. Matagal na po natin kasama si Rep. Ronnie Ong at ang kanyang pagtulong simula pa noong umpisa ng pandemya. At sa kabila rin ng bagyong Odette, nandito po kami para tulungan po kayo para sabay-sabay po tayong umahon. Sana po bukod sa tulong ay nakapagdala kami ng ngiti sa inyong lahat.”
Ang AP ay kasama ng mga lokal na opisyal at ibang mga organisasyon sa komunidad na nagsagawa ng feeding programs at namahagi ng free insurance cards upang matulungan ang ating mga kababayan sa maaaring aksidente na mangyari sa hinaharap.
