TARGET ng Land Transportation Office (LTO) na gawing full digital mode ang aplikasyon ng Student Permit at Driver’s license gayundiun ang renewal nito.

Sinabi ni LTO Chief Assistant Secretary Vigor Mendoza II, bahagi ito ng kanilang pagsusulong ng digitalization ng ahensya alinsunod sa direktiba ni Pangulong Ferdinand “ Bongbong” Marcos Jr.

Sa pamamagitan nito, mababawasan na ang face-to-face transactions sa ahensya na kadalasang pinagmumulan ng fixers.

Naniniwala si Mendoza na magiging epektibo ang teknolohiya upang mapuksa ang corruption sa lahat ng transaksyon sa ahensya.

Sa ngayon, pinapalakas na ng LTO ang information dissemination para mas mahikayat ang mga motorista na tangkilikin ang online transactions sa registration at renewal ng motor vehicle registration.

“Our aggressive efforts are in line with the instruction of President Ferdinand “Bongbong” Marcos, Jr. to our Department of Transportation Secretary Jaime Bautista to find ways to implement 100% digitalization for effective and efficient government service,” pahayag ni Mendoza.

Ayon kay Mendoza, nasa proseso na ang LTO sa pag-integrate ng bagong IT system sa lumang sistema upang masigurong hindi magkakaaberya o technical glitches.

“We are putting everything together or trying to put connectivity in place to make it seamless. This is already being done for Motor Vehicle Registration and hopefully, we can do that on Driver’s License in the soonest possible time,” dagdag pa ni Mendoza.

AUTHOR PROFILE

Zaida I. Delos Reyes