DUBAI, UAE–Dumalo si Department of Tourism (DOT) Secretary Christina Garcia Frasco noong Lunes sa opening ceremony ng Arabian Travel Market (ATM) 2024 kasama ang mga Philippine tourism stakeholders na naglalayong mabuksan ang mga potensyal ng Pilipinas sa turismo.

Nakipagpulong si Frasco sa humigit-kumulang 90 stakeholders sa turismo mula sa Gitnang Silangan.

“Pagkatapos ng napaka-matagumpay na ginanap kamakailan na Mindanao Expo, narito tayo sa Middle East kung saan tiyak na marami tayong pagkakatulad sa ating kultura,” sabi ni Frasco.

Nagbigay ang pinuno ng turismo ng pangkalahatang-ideya sa mga istratehiya at direksyon sa turismo ng Pilipinas sa ilalim ng administrasyon ni Pangulong Ferdinand “Bongbong” Marcos, Jr., partikular sa pagpapatibay sa posisyon ng bansa bilang destinasyon ng mga Muslim-friendly tourists.

“Being an archipelagic nation that can only be reached via air connectivity unless you take a cruise, we have work hard with the Department of Transportation (DOTr) as well as our partners in the private sector to really increase connectivity into the country,” sabi ng DOT chief.

Nagpahayag ang mga stakeholder sa paglalakbay at turismo sa Middle East ng pasasalamat sa pinuno ng DOT para sa inisyatiba.

Pinangunahan din ni Frasco ang pagbubukas ng Philippine Pavilion sa ATM 2024 sa Dubai World Trade Center (DWTC) at binigyang-diin niya ang kahalagahan ng paglahok ng bansa sa kaganapan.

“Natutuwa akong makasama kayong lahat ngayon sa Arabian Travel Market kung saan gagawin ng Pilipinas ang marka nito bilang Emerging Muslim-friendly Destination,” sabi ni Kalihim Frasco.

Noong nakaraang taon, nakabuo ang delegasyon ng Pilipinas sa ATM 2024 ng mahigit P1 bilyon sa mga sales lead.

Ngayong taon, umaasa ang DOT at ang Tourism Promotions Board (TPB) Philippines na lalampas sa sales noong nagdaang taon.

“Kaya sana, simula pa lang ang MOU (memorandum of understanding) na ito at na-engganyo rin natin ang marami sa ating mga stakeholder na gawin din ito. Secretary, you have our full commitment and we look forward to enlive this partnership,” sagot ni Megaworld Hotels and Resorts (MHR) Managing Director Cleofe C. Albiso.

Sa ilalim ng MOU, sasabak ang DOT sa MHR bilang isang strategic partner sa pagsasagawa ng mga inisyatiba, mula sa country branding, manpower training, product development at mga kaugnay na programa kabilang ang 2025 National Accommodation Standards, Halal and Muslim-friendly Tourism Standards and Guidelines, Balik Bayani sa Turismo, Philippine Retirement Authority (PRA)-accredited Merchant, at ang Filipino Brand of Wellness.

Dumalo rin sa MOU signing sina Ambassador of the Republic of the Philippines to the United Arab Emirates Alfonso Ferdinand A. Ver, Philippine Consulate General in Dubai Consul General Marford M. Angeles, TPB Philippines Chief Operating Officer Maria Margarita Nograles, Undersecretary Myra Paz Valderrosa-Abubakar, OIC-Undersecretary Verna Buensuceso, Assistant Secretary Maria Rica Bueno, at MHR Head of Hotel Sales and Strategic Partnership Claire D. Bernabe.