Pinatunayan ng sikat na Pinoy pop group na SB19 ang natatanging talento at kahusayan sa musika sa nakalipas na mga taon kaya hindi nakapagtatakang humakot sila ng mga parangal sa 14th at 15th Star Awards for Music ng Philippine Movie Press Club (PMPC).

Nagwagi ang SB19 sa iba’t ibang kategorya sa 14th Star Awards for Music sa pangunguna ng major awards na Song of the Year para sa kanilang awiting “Mapa” at Album of the Year para sa kanilang “Pagsibol” album sa ilalim ng Sony Music Philippines.

Nakuha rin ng SB19 ang Duo/Group Artist of the Year, Pop Album of the Year (“Pagsibol”), Dance Recording of the Year (“Bazinga”), Duo/Group Concert of the Year (“Our Zone: SB19 Third Anniversary Concert”) at Music Video Year (“Bazinga”).

Nagpatuloy ang panalo ng SB19 sa 15th Star Awards for Music nang magwagi sila ng Music Video of the Year para sa kanilang hit song na “WYAT (Where You At)” sa ilalim ng Warner Music Philippines.

Ang SB19, na binubuo nina Pablo, Stell, Felip/Ken, Justin at Josh Cullen, ang kinikilalang Kings of P-Pop.

Samantala, apat na veteran singers naman, na kabilang din sa mga haligi ng OPM, ang gagawaran ng Lifetime Achievement Awards — sina Hajji Alejandro (Pilita Corrales Lifetime Achievement Award) at Rey Valera (Parangal Levi Celerio Lifetime Achievement Award) para sa 14th Star Awards for Music; at sina Vernie Varga (Pilita Corrales Lifetime Achievement Award) at Odette Quesada (Parangal Levi Celerio Lifetime Achievement Award) para sa ika-15 edisyon.

AUTHOR PROFILE

Vinia Vivar