Mister patay, misis sugatan sa pananambang sa Cotabato City
PATAY ang isang mister habang nasa kritikal namang kalagayan ang kaniyang misis makaraang tambangan ng hindi pa nakikilalang suspek sa Cotabato City.
Nakilala ang nasawi na si Tiao Bilon, nasa hustong gulang at residente ng Barangay Bagua, Cotabato City.
Agad namang naisugod sa pagamutan ang asawa ng biktima na nakilalang si Maimona na nagtamo rin ng tama ng bala sa katawan.
Batay sa inisyal na ulat ng Philippine National Police, naganap ang pananambang sa Sitio Pimbaglang, Bgy. Kakangan 2, Cotabato City.
Lulan umano ang mga biktima ng motorsiklo patungo sa kanilang trabaho nang bigla na lamang silang dikitan ng riding in tandem at walang sabi-sabing binaril sa ulo ang lalaki na tumagos sa mukha ng ginang.
Kapuwa isinugod sa pagamutan ang mag-asawa subalit hindi na nailigtas ang buhay ng lalaki.
Sa kasalukuyan, patuloy ang isinasagawang imbestigasyon ng pulisya upang bigyang linaw ang insidente at maaresto ang mga suspek.
