Trabaho dedma sa 12-oras na byahe mapuntahan lang mga Claveriano
HINDI ininda ng Trabaho, bilang 106 sa balota, ang halos 12 oras na byahe upang tuparin ang pangako nitong babalikan ang mga residente ng Claveria, Cagayan noong Marso 27, 2025.
Ayon kay Trabaho nominee kagawad Nelson B. de Vega, determinado ang kanilang grupo na dalhin ang kanilang mga reporma maging sa mga tinatawag na “far-flung area” o mga liblib at malalayong probinsya na may lumiliit na populasyon.
Sa kaso nga ng Claveria, Cagayan, mayroon lamang itong populasyon na 31,900 sang-ayon sa 2020 census. Nabatid rin ni de Vega na sa liit ng populasyon rito ay marami pa ring umaalis upang humanap ng trabaho sa ibang lugar.
“Napakasipag po ninyong mga Claveriano kaya’t isusulong po ng Trabaho na mapataas natin ang deserve ninyong minimum wage,” pangako ng nominee.
“Tutulong din po ang Trabaho na maparami pa ang mga trabaho po dito para hindi na mapapalayo pa ang inyong mga pamilya,” dagdag pa niya.
Inikot din ng grupo ang palengke at mga toda ng tricycle sa Claveria. Ikinatuwa nila ang kasipagan ng mga manggagawa rito, lalo na ang mga senior citizen na pinipiling maghanapbuhay pa rin upang manatili silang malakas.
“Nakausap ko si lolo sa toda ng tricycle. Sabi niya sakin, “agkakapsot nak nu madinak agtrabaho” (‘pag hindi ako nagtrabaho lalo akong manghihina),” pagbabahagi ni de Vega.
Nakausap rin ng grupo sina mayora Lucille Angelus Guillen-Yapo, vice mayor Fredelino Agpuldo, Sangguniang Bayan Member (SBM) Edson Paul Flores, SBM Joshua Wangwang Salmon, SBM Jojie Calasag, SBM Blessette Vianney Pascua, at kagawad Constancia Rafol, at municipality tourism president Reyn Niduaza para sa maayos na koordinasyon sa nasabing pamayanan.
Maliban sa pagpaparami ng trabaho at pagpapataas ng sahod, isusulong din ng Trabaho ang abot-kayang internet access sa mga liblib na lugar gaya ng Claveria na magbibigay ng pagkakataon para sa mas maraming Pilipino na maka-access ng mga materyal para sa online education at skills training, at remote working opportunities.
