DUMALO si Pangulong Ferdinand R. Marcos Jr. sa grand launching ng VITRO Santa Rosa (VSR) data center sa Brgy. Pulong, Sta. Cruz, Laguna noong Miyerkules.

Pinangunahan ni Pangulong Marcos Jr. ang pagmamarka sa artificial intelligence (AI)-ready data center at ang pinakamalaking hyperscale facility sa Pilipinas.

Binuo ng VITRO Inc., isang subsidiary ng ePLDT sa ilalim ng PLDT Group, ang pasilidad ng VSR para sa digital infrastructure.

Ito’y ginawa upang suportahan ang mga advanced na pangangailangan sa pag-compute tulad ng mga serbisyo sa cloud, mga sistema ng enterprise na may mataas na pagganap at mga teknolohiyang AI-powered.

May kapasidad na 50 megawatts at mahigit 13,000 metro kuwadrado ang espasyo ng bagong pasilidad na pinapatakbo ng mga NVIDIA GPU server.

Nagbibigay-daan ito sa mga negosyo na gamitin ang real-time na data analytics, automation at mga susunod na henerasyong digital tools.

Ang VSR site kumokonekta sa mga pangunahing VITRO hub sa Makati City, Parañaque City at Pasig City sa pamamagitan ng VITRO Data Center Interconnect (DCI) para sa tuluy-tuloy na pagiging maaasahan at scalability ng network.

Ang paglulunsad ay nagsusulong sa pananaw ng ‘Bagong Pilipinas’ sa pamamagitan ng pagtataguyod ng isang mas matalino at mas konektadong lipunan.

Pinagtibay ni Pangulong Ferdinand R. Marcos Jr. ang layuning makipagtulungan sa pribadong sektor para sa digital transformation ng bansa.

Ayon sa pangulo, sinasalamin ng itinayong ICT infrastructure ng VITRO at ePLDT Group ang “people-centered approach” ng administrasyon sa technological advancement.

AUTHOR PROFILE

Jonjon Reyes