Nagbenta ng boga sa parak, swak sa selda
KALABOSO ang inabot ng isang lalaki ng pagbentahan ng hindi lisensyadong baril ang pulis na nagpanggap pa poseur-buyer sa Valenzuela City.
Sa isang bakanteng lote sa San Francisco St. Brgy. Karuhatan nakipag-transaksiyon ang suspek na si alyas Weng sa isang tauhan ni Valenzuela Police Chief P/Col. Nixon Cayaban dakong alas-4:55 ng umaga para sa pagbebenta ng hindi lisensyadong baril.
Nang tanggapin ng suspek kay Pat. Retuerto ang P20,500 na markadong salapi kapalit ng cal. 45 pistol na may magazine, dito na lumantad ang mga tauhan ng Station Intelligence Section ng Valenzuela police na nagresulta sa kanyang pagkakadakip.
Kasong paglabag sa Comprehensive Law on Firearms and Ammunition at paglabag sa Batas Pambansa Bilang 881 o ang Omnibus Election Code ang isinampa laban sa suspek sa Valenzuela City Prosecutor’s Office.
