Marbil pinasibak EPD chief
INIUTOS noong Sabado ni Philippine National Police (PNP) chief General Rommel Francisco Marbil ang pag-relieve kay Brig. Gen. Villamor Tuliao, hepe ng Eastern Police District (EPD), at mga miyembro ng District Special Operations Unit (DSOU), dahil sa mga mabigat na alegasyon ng extortion at grave misconduct na kinasasangkutan ng mga taga-DSOU na umaresto sa dalawang Chinese nationals sa Las Piñas City.
Walong personnel mula sa DSOU ang kasalukuyang nasa restrictive custody matapos masangkot sa paglabag sa proseso at extortion.
Nagsampa na ng mga kasong kriminal ang PNP bilang bahagi ng hindi matitinag na determinasyon nito na mananagot ang lahat ng mga nagkasala.
“Hindi na ito tungkol lamang sa mga pasaway na opisyal—ito ay isang kabiguan ng pamunuan,” pahayag ni Gen. Marbil. Tiniyak ni Gen. Marbil na walang second chances sa mga involved.
“Ang mga kasangkot dito dapat tanggalin agad sa serbisyo at permanente nang ma-disqualify sa anumang posisyon sa gobyerno.
Kung mapapatunayan na may pananagutan ang director sa ilalim ng prinsipyo ng command responsibility, hindi na siya pagkakatiwalaan sa anumang posisyon ng pamumuno,” giit niya.
Nagbigay ng matinding babala si Gen. Marbil sa lahat ng police commanders sa buong bansa.
Binigyang-diin pa ni Gen. Marbil na ang bawat opisyal, anuman ang ranggo, may tungkuling panatilihin ang pinakamataas na pamantayan ng pampublikong serbisyo.
“Ang badge na isinusuot niyo hindi proteksyon para sa abuso; simbolo ito ng tiwala ng publiko. Kung ibe-betray niyo ang tiwalang ito, tatanggalin kayo, ipakukulong at parurusahan ng buong bigat ng batas,” aniya.
Inutusan ng PNP Chief ang Internal Affairs Service (IAS) at National Capital Region Police Office (NCRPO) na magsagawa ng masusing imbestigasyon.
Ang mga administratibong at kriminal na kaso ipagpapatuloy laban sa mga sangkot.
