NAHARANG ng Bureau of Customs (BOC) kasama ng iba pang sangay ng gobyerno ang pagpuslit sa loob ng bansa ng P3.8 bilyong halaga ng shabu.

Ang pagkakasabat sa kontrabando ay nag-ugat sa derogatory report ng BOC mula sa Intelligence Group. Nakalagay umano ang shabu sa 530 pack na tinatayang isang kilo ng methamphetamine ang laman bawat isa.

Ang kontrabando ay nakalagay umano sa isang 1x 40’ container at idineklarang animal feeds mula sa Thailand.

Noong Setyembre 21 ay nagpalabas ang Port of Subic ng pre-lodgement control order laban sa naturang shipment at idinaan ito sa x-ray scanning. Sinundan ito ng pagsasagawa ng physical examination sa pangunguna ni District Collector Ciriaco Ugay at ng kanyang mga tauhan kasama ang National Bureau of Investigation (NBI), Philippine Drug Enforcement Agency (PDEA), Department of Justice (DOJ), Subic Bay Metropolitan Authority, Customs Anti-Illegal Drug Task Force, at PDEA K9 Handlers. Nagsagawa ng chemical analysis ang PDEA at nagpositibo na ito ay shabu.

Agad namang nagpalabas si District Collector Ugay ng Warrant of Seizure and Detention noong Setyembre 23 dahil sa paglabag sa Comprehensive Dangerous Drugs Act of 2002, at Customs Modernization and Tariff Act. Ang mga nakumpiskang iligal na droga ay inilipat sa pangangalaga ng PDEA.

“In this significant operation, law enforcement agencies successfully apprehended P3.6 billion worth of shabu, delivering a major blow to drug trafficking. The collaborative efforts of our dedicated teams, commencing with the BOC and CAIDTF, and notably the NBI and the PDEA, underscore our commitment to combatting the illegal drug trade and safeguarding our communities,” sabi ni Collector Ugay. Sinabi ni Ugay na patuloy ang kanilang maigting na kampanya laban sa smuggling alinsunod sa direktiba ni Commissioner Bienvenido Y. Rubio, at Pangulong Ferdinand R. Marcos Jr.

AUTHOR PROFILE

People's Tonight