Nagsagawa ng imbestigasyon ang mga pulis sa pinangyarihan ng pamamaril kung saan napatay ang isang lalaki ng riding-in-tandem sa Tondo, Manila.
Nakulong dahil sa baril, nakalaya, napatay ng RIT
UTAS ang lalaking bagong laya sa selda matapos pagbabarilin ng nakatakas na riding-in-tandem (RIT) sa Bambang St., Brgy. 254, Zone 23 Tondo, Manila noong Biyernes.
Ayon sa report, nakatayo sa Bambang St. ang biktimang si Henry Pangilinan alyas Tutong bandang alas-10:33 ng gabi ng biglang sumulpot ang mga suspek sakay ng motorsiklo at pinaputukan ng ilang beses ang biktima.
Tumakas ang mga suspek patungong Jose Abad Santos Avenue sa Tondo, Manila.
Naka-helmet, itim na mahabang manggas at sakay ng itim na motorsiklo ang mga RIT, ayon sa report.
Isinugod sa Metropolitan Hospital ang biktima ngunit idineklara itong dead-on-arrival dakong alas-11:38 ng gabi.
Lumalabas sa imbestigasyon na kalalaya lang ng biktima mula sa Manila City Jail noong Oktubre 3, 2024 dahil sa kasong paglabag sa RA 10591 (Comprehensive Firearms and Ammunition Regulation Act.)
