Ina ng batang nabundol ng bus humingi ng tulong sa ‘CIA with BA’
Dumulog si Gemma sa ‘CIA with BA’ upang humingi ng payo tungkol sa sitwasyon ng kanyang anak, na kasalukuyang nasa ospital matapos masagasaan ng bus habang nakasakay sa e-bike.
Sa segment na ‘Payong Kapatid’ noong Linggo, ibinahagi niya na pagkatapos ng insidente, nagkaroon ng kasunduan sa pagitan niya at ng bus company na sasagutin nila ang lahat ng gastusin sa ospital.
Pero sa kabila ng kasunduan, umabot na sa halos P500,000 ang hospital bill, habang nasa P5,000 pa lamang ang naibigay ng bus company para sa mga gastusin.
Dahil dito, nag-aalala si Gemma habang patuloy na tumataas ang bayarin, hindi siya sigurado kung paano tutuparin ng bus company ang pangako.
Binanggit ni Senador Pia Cayetano ang posibilidad na may kapabayaan sa kaso dahil maaaring hindi pinapayagan ang e-bike sa kalsadang pinangyarihan ng aksidente, na maaaring magdulot ng mga tanong tungkol sa pagsunod sa mga regulasyon ng trapiko.
Nagbigay naman ng legal na payo si Senador Alan Peter Cayetano batay sa kwento ni Gemma.
Ayon sa kanya, sa pangkalahatan, ang may kasalanan sa isang aksidente ang dapat managot sa mga gastusin. Binigyang diin niya na dapat ipursige ni Gemma ang mga karapatan at ang kasunduan sa pagitan nila ng bus company ay dapat igalang.
Nangako ang programa na tutulong kay Gemma.
“Ako, I pray na in a few months, maging success story natin (ito)… Sana ito ay isang obstacle na maging positive influence talaga, not just sa buhay ng family but sa lahat ng mga kamag-anak and mga kapitbahay,” sabi ni Ate Pia.
Ang ‘CIA with BA’ ay nagpapatuloy ng pamana ng yumaong Senador Rene Cayetano at umeere tuwing Linggo, alas-11 ng gabi, sa GMA7, na may replays sa GTV sa sumunod na Sabado, alas-10:30 ng gabi.
