VICE NAGBABALA SA PEKENG QUOTES ONLINE
Inamin ni Vice Ganda na naloloka siya sa fake news na naglalabasan tungkol sa kanya.
Sey niya sa “It’s Showtime” kahapon, huwag paniwalaan ang lahat ng mga nababasa sa social media dahil ilang beses na siyang naging biktima ng mga ito.
“Hindi lahat ng nababasa n’yong quote sa Facebook, totoong nanggaling sa akin, ha?” aniya.
“Ang dami kong nababasa na ‘Vice Ganda… quote, tsutsutsutsu.’ Kelan ko ‘to sinabi? Kelan ko ‘to tiniweet? Tatawag pa ‘ko sa social media team ko, ‘tinweet ko ba ‘to? Check n’yo nga,’” patuloy niya.
At ‘yun na nga, upon checking ay wala talaga siyang tweet at fake news talaga.
“Ta’s, makikita ko, ang daming comments,” sey niya.
Nagugulat na lang daw siya na sa bawat issue yata ay may comment siya na hindi naman niya sinabi.
“Nag-comment ba ‘ko diyan? Nag-comment ba ‘ko kay Dennis Trillo? ‘Yung ganu’n. Ang dami,” aniya.
Kaya paglilinaw niya, “Hindi lahat ng nababasa n’yong quote na nakalagay Vice Ganda, totoo po ‘yun. Kaya bahala kayo kung gusto n’yong maniwala.”
