SA isa sa mga Instagram story ni Box-office Superstar Vice Ganda, sinabihan niyang “madumi” at “salaula” si Multimedia Superstar Anne Curtis matapos niyang makita kung paano ito kumain.

Ang nasabing video ay parte ng kulitan ng dalawang “It’s Showtime” hosts backstage na kinaaliwan naman ng mga netizens.

Makikita sa video na kumakain si Anne ng wafer pero maraming nagkalat sa mesa kaya’t nililinis niya ito, agad naman siyang hiniritan ng biro ni Vice Ganda.

“Ang ganda mo pero ang dumi mo kumain. Tingnan mo oh? Pinagkainan niya, ang dumi!” pangba-bardagul ni Vice sa co-host.

Maririnig naman sa background ang malakas na tawa rin ni Sample King at host na si Jhong Hilario.

“Dumi, salaula!” biro pa Vice.

“Maputi lang talaga, kaya akala mo malinis sa katawan,” banat pa ng comedian.

Tinawanan lang naman ni Anne ang mga biro ni Vice at sinabing, “Oh, my God!”

Nagpatuloy ang dogshow-an ng dalawa sa video. “Pati kilay may waper (sinadyang maling bigkasin ni Vice ang salitang wafer)!” hirit muli ni Vice.

“It’s wafer!” pagtatama ng aktres.

“Sus, waper lang sa amin, wafer, wafer, mas matamis ba ang wafer sa waper?!” nakakaaliw na sagot ni Vice kay Anne.

Kumalat din ang nasabing Instagram story sa iba pang social media platform partikular sa TikTok. Hindi nagpahuli ang mga netizens sa pagbibigay komento sa biruan ng dalawa.

Narito ang ilang komentong nakalap mula sa netizens:

“Buti na lang sanay si Anne kay Vice sa pinagsasabi niya”

“You need to be strong to be around with Meme (Vice) jokes”

“The best talaga kayo my ViceAnne”

“BARDAGULAN NA NAMAN WAHAHAHAHAHAHA”

“The best talaga sila mag-asaran”

“Si Vice lang talaga makakaganyan sa kanila”

AUTHOR PROFILE

People's Tonight