Tsikang relasyon ni Kathryn sa Lucena mayor, walang resibo
Taken na raw si Kathryn Bernardo.
Ito ang latest pasabog ni Ogie Diaz sa kanyang YouTube vlog.
Simulang tsika niya, totoo raw na nagkaayos na sina Kathryn at Daniel Padilla, pero malabo nang magkabalikan.
“Ang sabi sa akin, eh, imposibleng maging si Daniel at si Kathryn. ‘Eto nga, kasi, kung single pa rin si Kathryn, pwedeng magkaroon ng possibility na kung liligawan ulit siya ni Daniel, ‘di ba?” aniya.
Pero hindi na nga raw single si Kathryn.
“Ang tsika sa akin ay taken na raw si Kathryn,” pagre-reveal ni Ogie.
Nagulat naman si Mama Loi at tanong niya, “In a relationship na?”
Sagot ni Papa Ogs, “Yes, mayroon na raw nagmamay-ari ng puso ni Kathryn?”
Sabi naman ni Mama Loi, “Really??? Da who???”
Sey naman ng talent manager/online host, “Ang sabi sa akin, ha, ang nagmamay-ari ng puso ni Kathryn ngayon ay walang iba kundi si non-showbiz.”
Dagdag pa niya, “Na-interview na niya ang guy nang one on one.”
Kasunod nito ay ini-reveal niya na young politician daw ito.
“Actually, noon pa. Naibalita na natin dito na nali-link si Kathryn sa isang politician na na-interview ko na, at the same time, naging estudyante ko sa Ogie Diaz Acting Workshop,” saad ni Ogie.
“Ah ‘yung gwapo!” sabi naman ni Mama Loi.
“Yes, si Mayor Mark Alcala ng Lucena City,” pagbubunyag ni Papa Ogs.
Ibinahagi rin niya na last year of July ay nagpadala siya ng chat message sa nasabing politiko kung totoong nanliligaw ito kay Kathryn pero hindi ito sumagot.
“So true nga?” tanong niya ulit pero hindi raw ito sumagot uli.
“So, kinonclude ko na, ‘ah, so nanliligaw nga si mayor,’ hindi siya sumagot.”
Kung kelan naging sila, ang sabi raw ng kanyang source ay either November or December.
“Eh, nu’ng Nov. 13, ipinalabas ang ‘Hello, Love, Again,’ siyempre kung ako si Mayor Alcala, eh, hindi ako papasok sa eksena, kasi ano pa ‘yan, eh, KathDen ‘yan, eh,” aniya.
Ang sabi pa raw sa kanya ng source niya, minsan ay si mayor ang pumupunta sa Manila para magkita sila ni Kathryn, minsan naman ay ang aktres ang nagpupunta sa Lucena.
Pero duda si Ogie dahil napakahusay naman daw magtago ng dalawa dahil hindi napapabalita at hindi rin nakukunan ng larawan na magkasama.
“Walang resibo,” ani Ogie.
Pero nilinaw naman niya na hindi naman ito confirmed at basta ito lang ang nakarating sa kanya base sa kanyang source.
Well, panahon ang makapagsasabi kung totoo ito dahil sabi nga, lalabas at lalabas din ang katotohanan.
Bukas naman ang People’s Tonight sa anumang paglilinaw o pahayag nina Kathryn at Mayor Alcala.
